Der Peter Fritsch vun Langschwamm (Baricks Kaundi) waar widder deitsch am singe un schpiele in die Zeit “zwischich die Yaahre”. Zamme mit zwee annere Kalls hot er widder der Neiyaahrswinsch gewwe in die Heemete vun die Leit in die Gegend. Sie henn noch meh Schticker gschpielt. Eens vun selli weise mer heit do uff “hiwwe-wie-driwwe.de” …
Noch ebbes: Die Lengeschter Mennonite Historical Society schtaert en nei Claess fer Pennsylvaanisch-Deitsch. So wann dihr ebber kennt, wu geindresst waer in die Mudderschprooch lanne, noht kennt dihr sell Kall oder Weibsmensch saage, ass der Butch Reigart (Schulmeeschter) am Dunnerschdaag, der zwelft Matz, die erscht Schtunn gebt (7 p.m.). ‘S gebt aa en Claess fer Leit, wu schunt en wennich Deitsch schwetze. Selli schtaert am Mittwoch, der elft Matz (7 p.m.). Die Address iss: 2215 Millstream Road, Lancaster (PA). Meh Information kammer gricke, wammer selli Nummer uffruft: (717) 393-9745.
Heit un maryie iss Faasnacht im alte un im neie Land, un hiwwe wie driwwe sinn sie am backe alleweil: “Krebbel” in die deitsch Palz un “Faasnachts” in Pennsylvaani. In der Deller uff em Pickter owwe sinn Paelzer Krebbel, yuscht paar ass noch iwwerich sinn.
Der Douglas Madenford in Pennsylvaani hot aa Faasnachts gemacht (Pickter unne). Gucke sie net wie selli, ass sie in die Palz im alte Land gebacke henn? Ferwas sie im neie Land dreieckich odder viereckich sinn, kennt dihr lese uff em Heemetblatt vum Doug. Datt kammer aa sehne, wie sie gucke, wann sie faddich sinn. Klick uff “Deitsch Blog” rechts fer meh ausfinne iwwer die Faasnachts in PA.
Yuscht noch eens: Guck, ass du net der letscht bischt maryie, wu wacker watt, schunscht bischt die “Alt Faasnacht” un muscht all die Arewet schaffe bis Mittnacht! Sell iss der Weg, ass es iss – hiwwe wie driwwe.
Glaabt’s odder net, awwer die Grundsei in Pennsylvaani henn ihr Schadde gsehne heit – aa der Punxatawny Phil ganz drauss im Wescht vum Billy Penns Waldland. Dihr wisst, was sell meent. Ya, dihr kennt hoffe, ass dihr noch genunk waarme Gleeder im Schank henn fer eich waarm aaduh die neegscht Zeit. Verleicht schneet’s aa widder – mer weess net. Awwer ich will eich Buwe un Meed im neie Land wennich Drooscht gewwe: Der Dax hot aa sei Schadde gsehne im alte Land. So hemmer zamme kalt un gricke en roodi Naas: Hiwwe wie Driwwe!
