Glieder vun die “Kelly Family” henn Freindschaft in Pennsylvaani un die Pfalz im alte Land

Sell iss verleicht meh en Neiigkeet zu die Leit im alte Land. En Familie mit Name “Kelly” iss alliwwer guud bekannt in Deitschland fer ihr Musick. Der Paep und die Memm henn geschtaert in die 1970 mit ihr 10 Kinner Musick schpiele middes in die Schteddel, un die Leit henn sell gegliche. Schpeeder henn sie Concerts gewwe in grosse Bletz. “Kelly” iss ferschur Eirish (un gedollisch), un die meenschte Glieder gucke wie sell. Awwer die zwett Fraa vum Paep waar vun Ohio, un sie waar en Brodestand. Nau henn Genealogists ausgfunne, ass die Kellys uff die Mudderseit Naame wie Kline, Faassnacht, Faassnacht-Meentzer un Mellinger (Möllinger) in ihr Familiebaam henn. Interesting iss abbadich die Mellinger Familie. Der erscht Mellinger in die nei Welt hot gsettelt in Ephrata un gwuhnt neegscht zum Cloister zamme mit der Conrad Beissel. Er waar en Mennischt vun Ruchheim aus die Pfalz (en glee Schtettel neegscht zu Frankenthal). Die Voreldre vun seller Mellinger henn zu duh ghatt mit der Jakob Ammann. ‘S hot en grooss Dischbedutt gewwe zwischich die Mennischte un den Drupp Mennischte Leit, ass mehner gegliche henn, wie der Ammann die Biewel ausglegt hot. Fer sell hot’s en Splitt gewwe zwischich die Mennischte un die Leit, ass mer schpeeder “Amish” gheesse hot. ‘S gebt es Blatt Babier, wu sell Splitt uffgschriwwe iss warre – un sell Babier waar gseint bei en Kall mit Naame Mellinger … der Joey Kelly, ass es meenscht geindresst waar in selli Gschicht, hot sell schier net glaawe kenne. An der do Blatz kenne mer yuscht der letscht Paert vun 3 uff’s hiwwe-wie-driwwe.de duh. Die erschte zwee Paerts kammer leicht finne uff youtube.de.