Thomas C. Zimmerman: “Metrical Translations into the Pennsylvania German” (1902)

Aardlich hatt zu finne iss es Bichli “Metrical Translations from the German and English Classics and from the Irish and Scotch Dialects into the Pennsyvlania German”, ass der Thomas C. Zimmerman (1838-1914) gepublisht hot im Yaahr 1902. Un wammer’s findt, iss es net wolfel fer kaafe. Sei’s, wie’s will: ‘S iss en guud Bichli mit guudi Schticker drin. Der Zimmerman waar gebore in Lebnen Kaundi, waar en Drucker un hot gschafft fer die “Reading Times” etliche Yaahre. In sell Schtettel iss er 1914 aa gschtarewe. Klickt yuscht uff sell Bichli, un dihr kennt sei pennsylvanisch-deitsch Schreiwes online lese:

Harry Hess Reichard: Pennsylvania German Dialect Writings and their Writers (1918)

Pennsylvania German Dialect Writings and their Writers

Harry Hess Reichard (1878-1956) waar en pennsylvanisch-deitscher Schreiwer un Scholar. Er waar gebore in Naddhampton Kaundi. Zwischich 1924 un 1948 waar er en Hochdeitsch-Professor am Muhlenberg College in Allentown. Der Harry Hess Reichard hot aa en Radio Program geduh, ass guud bekannt waar alliwer: Assabe un Sabina. Datt hot er der “Assabe Mumbauer” gschpielt zwischich 1944 un 1955.

Im Yaahr 1918 hot er en grooss Buch gepublisht iwwer die pennsyvlanisch-deitsche Schreiwer. Nau kammer es aa online lese. Klickt yuscht uff sell Cover.

Mer henn den Owet kenn Pickter vum Harry Hess Reichard finne  kenne. So wann dihr eens habt, schickt’s zu Hiwwe wie Driwwe, un mer babbe ‘s datt anne in der do Article.

Daniel Miller: Pennsylvania German, Vol. 1+2 (1904/1911)

Daniel Miller (1843-1913) waar gebore in North Annville Township,  Lebanon Kaundi. Er hot Drucker glannt beim “Lebanon Pennsylvanier”. Schpeeder hot er in Reddin gschafft. Sei erschte Schticker in die Mudderschprooch hot er in 1869 gschriwwe fer der “Republikaner von Berks”, en hochdeitsch Zeiding. In 1904 hot er en “Collection of Pennsylvania German Poetry and Prose” gepublisht. Do kammer es nau online lese. Klick yuscht uff sell Bichli.

Pennsylvania German Vol. 1

Pennsylvania German Volume 2

J. Max Hark: En Hondful Faersh (1900)

J. Max Hark (1849-1930) waar in Nazareth (PA) gebore un waar en Herrnhuter. Im Oktower 1899 hot er en paar Gedichte vorgelese bei en Versammling vun die Pennsylvania German Society. Die Leit henn’s gegliche, un so hot die Society en Bichli gedruckt in 1900: “En Hondful Faersh”. Der J. Max Hark hot weise welle, ass mer net yuscht gschpassiche Sache schreiwe kann in die Mudderschprooch. Der HwD Drucker gleicht abbadich die Schticker “Der schpoode Schulbu” un “Wann der Wind mol iwwer die Schtobble bloost”. Guckt yuscht mol nei. Sell Bichli kennt dihr nau aa online lese:

Thomas H. Harter: Boonastiel (1893)

Eens vun die bescht bekannte Bicher in Pennsylvanisch-Deitsch iss “Boonastiel. A Volume of Legend, Story, and Song”. ‘S waar gedruckt im Yaahr 1893, un gschriwwe hot’s der Thomas H. Harter (1854-1933). Der Thomas Harter hot kenn Englisch gekennt, bis er 12 Yaahr alt waar, un er iss erscht in die Schul gange, wie sei Familie naach Aaronsburg, PA, gezogge iss. Selli Zeit waar er 15 Yaahr alt. Wie er uffgwaxe waar, hot er es Drucker Bissnis glannt, un schpeeder waar er en Publisher un Journalist. Wie er fer die Middleburg Post gschafft hot, hot er gschtaert “Letters to the Editor” schreiwe in Pennsylvanisch Deitsch. Selli hot er gsigned mit der Naame “Gottlieb Boonastiel”. Die Leit henn sie abbadich gegliche, so hot der Thomas Harter en Bichli zamme grickt mit 117 vun selli Brieflin. Sell Bichli iss fimfmol gedruckt warre zwischich 1893 un 1942. Der HwD Drucker hot’s Graab vum Thomas Harter bsucht in Aaronsburg im Yaahr 2007. ‘S iss als noch datt. Wammer uff sell Bichli klickt, kammer all die “Briefe zum Drucker” vum Gottlieb Boonastiel online lese:

Henry Harbaugh: Harbaugh’s Harfe (1870)

Alliebber im alte Land kennt der “Johann Wolfgang von Goethe”, un all die Pennsylvanisch-Deitsche kenne der Parre Henry Harbaugh. Er waar eener vun die erschte Kalls, ass ebbes in die Mudderschprooch gschriwwe henn. Wie er mit 50 Yaahr gschtarewe waar im Yaahr 1867, hot en Freind en Bichli mit sei Gedichte zammegrickt: Harbaugh’s Harfe. Sell waar im Yaahr 1870. Nau kammer sell Schreiwes, ass er geduh ghatt hot zwischich 1861 un 1866, aa online lese. Klick yuscht uff sell Bichli:

Ludwig August Wollenweber: Gemälde aus dem pennsylvanischen Volksleben (1869)

Ludwig August Wollenweber waar 1807 in Speyer im alte Land gebore un iss schpeeder ins neie Land gezogge un hot in Pennsylvaani gsettelt. Gschafft hot er ass en Schreiwer un Journalist. Er waar der eenzichscht vun die 19th Yaahrhunnert Emigrants, ass gwellt hot, ass mer ihn net en “Deitschlenner” heesst. Er hot seilewes welle en Pennsylvanischer Deitscher sei. 1869 hot er en Dialect Bichli gedruckt mit Title “Gemälde aus dem pennsylvanischen Volksleben”. Do iss es:

Les es Bichli online: Klick mich!