Der Virgil Schrock, ass Amish uffgebrocht waar in Illinois un alleweil in Paris (France) lebt, verzehlt widder ebbes in die deitsch Mudderschprooch. Dihr wisst, ass Amish net gleiche, wammer en Pickter nemmt vun http://obits.lancasteronline.com/index.php?p=2815752
sie odder en “Record” grickt vun ihr Schwetzerei. Fer sell iss es abbadich, ass der Virgil nau alliebber weist, wie die Amish in Illinois ihr Deitsch am schwetze sinn. Wann dihr mehner vun selli Videos uff hiwwe-wie-driwwe.de abgewatcht hennd, henn dihr ausgfunne, ass die Schprooch vun Amish bissli annerscht iss wie die Schprooch vun Luthrische un Reformierte. Sie yuuse meh englischi Wadde, un ihr ganz “intonation” un “syntax” iss neecher zu English. Grooss Dank, Virgil, fer sell Video uff Youtube duh …

Der Virgil Schrock schwetzt iwwer die Muddersprooch …

Hurrah fer der Winder

Hurrah fer der Winder, hurrah fer der Schnee!
Nau raus mit’m Schlidde, un zaehl mer kenn zwee.
Do muss mer sich dummle, sunscht geht er eweck;
Verleicht bis uff maryie hot’s nix as wie Dreck.

Hurrah fer der Winder! Der Schlidde muss raus.
Was hockt mer am Offe, was will mer im Haus?
Un druff mit de Belle, sunscht is’s kenn Gfaahr.
Der Winder is katz un die Schliddebah rar.

Hurrah fer der Winder! Nau geht’s emol ab.
Wie schneller, wie liewer. “Git up, Sal un Bob!”
Was rabble die Belle, was schpringe die Geil!
Des is mol en Gfaahr, es geht ya wie’n Peil!

Hurrah fer der Winder! So eppes is Gschpass.
Die Maed singe en Liedel, die Buwe der Bass.
Un geht’s in die Schneebaenk un schmeisst’s emol um,
Geht’s drunner un driwwer, was gebt mer dann drum?

Hurrah fer der Winder! Mit Eis, Schnee un Kaelt!
Wann’s glaenzt as wie Silwer—sell is yuscht, was fehlt.
Wann’s Schnee hot, watt gfaahre, wann’s Eis hot, watt gschkeet,
Hurrah fer der Winder, abaddich, wann’s schneet.

Hurrah fer der Winder, hurrah un hurrah!
Nau raus mit’m Cutter un druff mit der Fraa.
Un loss’s mol glingle, as alle Hund blafft!
Der Winder is do un die Arewet is gschafft.

Astor C. Wuchter

(Noch eens: ‘S Program geht 60 Minudde. Es Interview mit em Richard Savidge schtaert in Minudd 27, un er lest sei Gedicht in Minudd 51. Mer muss net 60 Minudde bleiwe, wann dihr net wett. Geht graad zu Minudd 27, wann dihr kenn Zeit hennd. Awwer es Singes vum Dolpehocken Chor iss aa ganz guud. Viel Gschpass!)

En Kall weist die Leit uff Youtube, was am aageh iss bei die Fuhremennischte in Yakobschtettel (St. Jakobs, Ontario). Er iss aa am schwetze mit en Mennischt, ass am schaffe iss im Versammlinghaus. Ich denk allemol, ass die Fuhremennischte – abbadich selli in Ontario – besser die Mudderschprooch am schwetze sinn wie die Fuhremennischte in Pennsylvaani odder all die Amische. Weess net ferwas, awwer sell iss, wie es iss. Was seid dihr am driwwer denke?

Mei Daadi (er is nau schun paar Yaahr doot) hot sei Lewes gewinscht un is nausgange zwischich der Grischtdaag un Nei Yaahr zu eenichebber, as es hawwe hot welle, mit en Drupp Kalls, as aa Inschtrumender schpiele hen kenne. Der Daadi hot’s Winsch gewwe, un no hen sie all paar Schticker gschpielt un aa gsunge.

Mir winsche eich en glickseeliches Neies Yaahr —
En Bretzel wie en Scheierdoor,
en Brotwascht wie en Offerohr;
Dezu en groosser eckicher Disch,
Uff yederm End en gebrotner Fisch;
Un in der Mitt en Boddel Wei,
Des soll unser Neiyaahrswinsch sei.
Des soll eich awwer net verdriesse,
Wann mir eich des Neiyaahr aaschiesse,
Wann macht es eich kenn Verdruss,
So sott ihr heere unser Schuss.
Nau duhne mir die Haahne ricke,
Des Pulverfeier sott ihr erblicke,
Mit dem Winsche isch’s nau aus,
Gnalle muss es vor eierm Haus!

Un ya, mer kann gut wedde, as sie aa gedrunke hen. Un’s waar aa net yuscht Seider! Des waar als schlimm owets, wie er gsoffe heemkumme is. Awwer er hot gut gemeent, weil er hot hawwe wolle, as die Neiyaahrswinsche un Neiyaahrschpieler net vergesse warre odder zu nix geh. Wie er yung waar, hot er schun Guitar gschpielt un is mit so en Drupp rumgange fer Winsche. En anner alder Kall hot’s Winsche geduh. Wie seller alder Kall gschtarewe is, hot der Paep es iwwer genumme mit der Winsch gewwe. Mei Schweschder (accordion), zwee vun ihr Buwe (guitar, banjo) un ich (hammer dulcimer) hen’s no iwwer genumme, wie der Paep gschtarewe is.

Peter V. Fritsch