‘S Katz Deitsch Schtick

Faasnacht

Was waar’s doch als en Luscht gewest,
Wann’s g’heesse hot, die Faasnacht kummt;
Mer hot sich g’freet schun wochelang,
Gepiffe, g’sunge un getschumpt;
Die Mammi hot ehm lengscht gedrillt:
„Nau, Buwe, schaffen Oier bei,
Wann’s Faasnacht Kuche gewwe soll,
Do missen latt vun Oier nei.”

Noh iss mer naach der Scheier ab,
Uff’s Schtroh un Hoi, uff’s Welschkannlaab,
Un g’sucht, eb’s aryets Oier hett -
Mer waar ganz zu mit G’frees un Schtaab.
Un wammer noh eens g’funne hot,
Was hot mer g’scharrt fer naach em Haus.
„Do, Mammi, iss eens, nemmt’s noch meh? -
„Ya, Buwe, schunscht gebt’s schur nix draus.”

Wann als der Daag ball kumme iss,
Noh hot en yeders noch gezarrt,
„Ich wunner, wer die Faasnacht gebt,
Wen’s drefft, der watt ins Seifass g’schparrt.”
Mer hot sich awwer als gewehrt,
Un’s waar ehm doch so halwer bang,
Mer waer verleicht der letscht im Bett,
Noh misst mer’s heere wochelang.

Was hot mer g’scharrt fer maryets raus,
So ass mer net die Faasnacht waer;
Der Mammi waar’s mol rufe g’schpaart,
So frieh waar’s Bett schun lang net leer.
Noh hot mer iwwer die gelacht,
Wu nix geduh henn wie gezarrt,
„Do kummt die Faasnacht hinnenoh,
Nau watt sie mol ins Seifass g’schparrt.”

Wann’s Breckfescht mol veriwwer waar,
Un all die Arewet aus’em Weg,
Noh hot die Mammi ‘s Backbord grickt,
Un holt en groosser Wambe Deeg,
Un legt en druff un drickt en rum,
Un rollt en in so Scheiwe aus;
Noh hot sie’s Reedel haddich grickt,
Un schneid die schenschte Kuche raus.

Bis alles noh recht gange waar,
Datt hinner’m Offe uff der Kischt,
Waar’s Fett am Koche in der Pann, -
Mer hot sich’s Maul schun abgewischt.
Datt hot sie noh die Kuche nei;
Die sinn datt g’schwumme wie die Gens.
Was henn sie scheene Backe grickt,
Ganz dunkelbrau mit geele Krenz!

Sie waare schee, sie waare guud;
Was hot’s ehm Abbeditt gemacht,
Sie yuscht zu sehne uff’em Disch! -
Der Bauch, der hot ehm recht gelacht.
Uff kors, die Mammi hot’s gewisst,
Wie hungrich, ass so Buwe sinn;
Was hot sie groosse Schissle g’hatt,
Un Kuche, ass wie Hoischteck drin.

‘S maag sei, wie’s will, ‘s iss net, wie’s waar,
Ihr alte Kalls, ihr wisst’s zu guud;
So Dings vergesst sich net so leicht,
So ebbes draagt mer net im Hut.
Ach! Wammer alsemol draa denkt,
Wie’s waar in seine yunge Yaahr,
Mer geebt der beschte Gaul im Schtall
Fer’n Woch wie sellemols, net waahr?

Edward Hermany (1832-1896)

Mir lanne deitsch

Alle Sadde Wadde: Verbs

Zammelaaf in Lebnen!

Originally posted on Nau loss mich yuscht eppes saage!:

Guder Daag Blog Leser! Selle Woch hawwich en grosse Bekanntmaching zu gewwe. Alle Yaahr in Lepnan gebt es en Pennsylvaanisch Deitsch Fescht. Selles Yaahr iss der Pennsylvaanisch Deitsch Zammelaaf uff der 22. Matz, 2014. Es waerr uff re New Covenant Grischtliche Schul (452 Ebenezer Schtross, Lepnan, PA) sei. Es koschdet nix reizugeh! Alles fangt um 9 Uhr aa.

Sie waerre Deitsche Handwarricks un Kunscht zu kaafe un aa nadierlich appeditliches Deitsches Esse. Selles Yaahr gebt es aa Kinnerschpiele! Es gebt ee paar Schwetzer un Leit die en Presentation mache waerre:

9:30 – Die Schwadore Schalle waerre singe. Die Schalle iss en Drupp vun Kinner un Uffgwaxeni die in re Mudderschprooch singe. ‘Sis arrig schee die Schprooch mit Myusick zu heere, abbadich wann es vun Kinner gsunge iss. 

10:45 – Der Dr. Robert Kline waerr die Presentation “Schweschder Schprooche: Pennsylvaanisch Deitsch un Yiddisch” gewwe. Sell klangt arrig inderessant. Ich hoff as…

View original 197 more words

Deitsch Web-TV

Well, sell iss yuscht en private Botschaft zu mei Freind, der Doug: Mir Deitsche aus em alte Land henn allfatt en hatti Zeit fer English schwetze mitaus unser deitscher Accent (un’s schafft nie net, eenicherweg!). Dich heere English schwetze mit dei pennsylvanisch-deitsch Accent macht ferschur 82 Million Deitsche do hiwwe in Europe guud fiehle. So was kemmer duh? Sette mer unser Haend blatsche odder unser deitschi Schtrohiet in die Luft warefe. Nee, mer saage yuscht: “Grooss Dank”. Mach’s guud. Der Hiwwe wie Driwwe Drucker.

‘S Katz Deitsch Schtick

Am zwette Hanning

Zum Wedderbrophet:

Grundsau! Grundsau!
Saag uns mol vum Wedder nau!
Iss der Winder ball verbei,
Odder watt’s noch wieschter sei?

Die Grundsau

Waart emol! Am zwette Hanning
Weis ich dihr mei Wedderlanning:
Ya, des weess ich viele besser
Wie die Dokter un Brofesser!

Deel, die gucke naach die Stanne,
Wolle’s Wedder datte lanne;
Dann sinn annre Weddermenner,
Deide’s Wedder vum Kalenner.

Meene noch, die Gensbrophete
Wunners, was sie wisse deete;
Was sie bralle, was sie boche,
Mit’me dumme Gensegnoche!

Glaabt net yedre alde Fraa!
Ich geh annerschter do draa:
Hawwich net en gudie Naas,
Besser wie en Wedderglaas?

Wann ich aa noch schlaefrich bin,
Hawwich’s awwer doch im Sinn,
Iwwerdem mol uffzuschteh
Un mol aus’em Loch zu geh.

Iss es dann en wennich drieb,
Well, des waer mer graad so lieb;
Schnee un Kelt waer dann verbei,
Friehyaahrswedder hett mer glei.

Un dann fang ich aa zu danze,
Fress mer mol en voller Ranze;
Ya – des macht mich immer lache -
Brauch aa net emol zu schaffe!

Awwer, scheint en bissel Sunn,
Bleibt der Winter, weess ich schun,
Immer noch sex Woche lang;
Un do watt’s mer angscht un bang.

Ei, was hett ich dann zu lewe?
Ya, do kaemt ich wiescht deneewe!
Kalter Wind un Schnee so dief -
Kaemt am End noch uff „Relief!”

Oh, des waer fer mich en Schand!
Grundsau hot doch meh Verschtand,
Losst sich net dehinner finne,
Brauch sich aa net zwee mol b’sinne.

Un im neegschte Aageblick,
Bin ich schun im Loch zurick;
Winter losst mer Winter sei,
Un dann schlof ich widder ei.

John Birmelin (1938)

Deitsch Web-TV

Ein Beischpiel fer Amish Hochdeitsch

Die lengscht Zeit in 300 Yaahr waare die meenschte Mudderschprooch-Schwetzer Kinner un Kinnskinner un Lutherische un Refermierte. Awwer sell hot gwexelt nau – es sinn alleweil die Amish un Fuhremennischte, wu die deitsch Schprooch lanne zu ihr Kinner un sie am geh halde.

Gmeenerhand gleiche sie awwer net, wammer en Pickter nemmt vun sie odder en Video macht. Awwer: Bei neegscht 300,000 Leit, ass en Glied sinn vun was mer verleicht en “plain sect” heesse deet, meh un meh Leit verlosse aa die Gmeene un gucke fer en meh liberal “Karich” (verleicht en Beachy Amish Gmee odder en anneri Mennischte Karich). Un wann sie sell gduh henn, henn sie kenn Druwwel meh mit Photos un Videos. Un des do Video iss en guud Example, was die Leit mitnemme vun die Amish Gmee (die Lieder, die Mudderschprooch) un was sie dezu gricke in ihr nei Lewe (alle Sadde vun Technology).

Es Lied, ass die Buwe am singe sinn, heesst “Wo ist Jesus, mein Verlangen?” und waar gschriwwe beim Johannes Scheffler (1624-1677). ‘S iss aa en ganz guud Beischpiel fer des, was mer verleicht “Amish Hochdeitsch” heesse deet: Hochdeitsche Wadde mit en pennsylvanisch-deitsch Pronunciation … sell iss aa, was sie breddiche in die Gmee.

Klick datt: Wo ist Jesus, mein Verlangen?

Deitsch Web-TV: Alle Sadde Wadde

Dihr liewi Leit,

mer winsche all unser Leser im alte un im neie Land en glickliches Yaahr 2014!

Meins hot guud gschtaert, weil ich ausgfunne hab, ass unser deitscher Freind Douglas Madenford vun Pennsylvaani widder deitsche Videos am zammegrucke iss. Desmol sinn’s kenn Lessons, awwer ebbes iwwer “Alle Sadde Wadde”. Allegebott welle mer eens vun seine Videos do abweise. Mer schtaerte mit: “Veggel in der Luft”. Viel Gschpass!

Der “Hiwwe wie Driwwe” Mann