‘S KATZ DEITSCH SCHTICK: November 2007

Schpucknacht

Schpucknacht iss en Zeit vum Yaahr,
Das ebbes duht zu ehm sei Haar!
Faricht schtellt sie in die Heh
Un macht ehm zidderich uff der Beh.

‘S iss net die Nacht, awwer Schpuck, ass kumme
Mit schwatze Katze, ass sachder brumme
Un Schpeckmeis, ass fladdere in die Nacht
Un weisse Geischder unne Yacht.

Glaabt dihr an Schpuck? Ich denk, ich sett!
Ich waar mol do deheem im Bett
Uff Schpucknacht, yuscht paar Yaahr zerick:
No kummt en Mennli unni Rick!

Der Kopp, die Fiess, die Hend un Beh,
Alles waar im Blatz so schee,
Das wie der Rick: er waar net datt –
Un Ohre hot er aa net ghatt!

Uff seim Kopp waar en grooss weiss Gwex –
Verleicht die Arewet vun ‘re Hex!
No guck ich an die Schpeicherdier
Un datt waar aa en wiescht Gedier!

Gschiddelt hawwich wie en Laab im Wind
Un gwinscht, ich waert schtee-daab un blind.
Langsam bin ich unnich die Deck
Un gewinscht die Schpucke gingde weck.

Glei rappelt ebbes wie net gscheit –
Hab gwunnert, was des nau bedeit;
Hab der Kopp schnell in die Heh –
Datt waar die Mariyesunn so schee.

Ach, ich hab yuscht wiescht gedraamt,
Die Satt, as die Gedanke lahmt!
Doch vun Schpucknacht iss des all en Schtick
Un des geht so weit zerick.

So wann dihr ebbes glaawe wett,
Sucht erscht die Wahret raus.
Falsche Glaawe sinn die Schpuck
In yederm Mensch sei Haus.

Farichtgedanke sinn noch schlimmer
Un gifdich zu der Seel,
Un der, ass aahebt zu ‘ne
Iss gheiert zu ‘re Gwael!

Ernest Waldo Bechtel (1923-1988) 

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s