‘S KATZ DEITSCH SCHTICK: Matz 2008

Die Gwilderei

Die Mary iss en guudi Fraa;
sell will ich am erschte saage.
Sie dutt net geh un Geld verbloose,
odder uff’ em Weg rum yaage.
Sie butzt des Haus
und wescht die Gleeder,
zwee odder drei mol die Woch,
Un all die Nachbarschaft iss g’wiss,
sie iss en guudi Koch.
Awwer wann die Daage katzer warre
un Schnee datt draus rum blost.
No kummt en fremder Nadur in sie;
mer weess net, was iss los.
Es muss mol alles aus die Schtubb;
en holzich G’schtell kummt nei;
No watt en Gwild datt fescht geschpellt;
er guckt so frech un fei.
Sie heesst die Nachbarweibsleit all,
die Betz un die Matilda.
No wann mer heem kummt,
iss’s Haus voll;
sie hocke datt am gwilde.
Sie hocke all datt ausserum;
die Schtubb iss yo ganz voll.
‘S iss schier kenn Blatz fer newe darich,
vielleicht en vaddel Zoll.
Sie schwetze datt vun alle G’schicht,
ass mer seilewe denkt.
Sie gehn datt darich
vun Adam’s G’scheft
bis ganz an des Weltend.
Es Nachbar’s Kindli graddelt datt;
es hot die Hosse g’fillt.
Die Weibsleit henn es net vermarikt;
sie hocke datt am Gwild.
Die Supp hot paar mol iwwer gekocht;
un hot die ganz Kich g’fillt.
Un sie henn’s net vernumme,
weil sie hocke datt am Gwild.
Datt schteche sie fascht Daag un Nacht
bis ihre Finger schwillt;
Un alles schunscht
watt schlimm verseimt;
sie bleiwe yuscht am Gwild.
Mir duhn yuscht uff mit selle Sach;
mer dutt recht hatt browiere;
Es macht ehm doch
schier gaar verruckt,
un aarick mutlos schpiere.
Der Gwild watt endlich faddich g’macht
un alles weck geduh.
Mer geht mit groosser Freed ins Bett;
mer grickt mol endlich Ruh.
Der neegscht Owet kummt mer heem;
mir hockt yuscht hin un brillt.
Weil es erscht Ding,
ass mer sehnt datt drin,
iss noch en grooser Gwild.
Un so geht’s an, der Winder lang,
bis Daage laenger warre;
Un noh uff eemol iss es verbei;
mer misse in der Gaarde.
Der Gwild geht weck;
die Schtubb guckt leer;
‘s iss alles z’rick im Blatz.
Mein Fraa hot ihre g’sund Verschtand,
bin dankbar in meim Hatz.
Des Leewe doh in unserem Haus
geht nau gemiedlich an.
Des Gwilderei iss all verbei;
ich hab widder en Fraa.
En lange Zeit henn mer es schee;
des Gwilde iss vergesse;
‘S iss alles guud un frisch gebutzt,
un mer henn blendi Esse.
Awwer wann der Schnee
mol widder fliegt
un Daage warre katz,
No kummt sell alt Ding widder uff,
sell yaahrlich Gwildesschmatz.
Ich denk, mer nemmt’s
yuscht graad wie’s kummt;
mer muss sie es all yuscht schenke.
Es hot wohl schlimmere Sache;
graad nau kann ich kenne denke.

Enos Stutzman (London, OH)


Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s