‘S KATZDEITSCH SCHTICK: Oktower 2010

Die Lumbeschweschdere

Des iss en waahri Gschicht, ass umgfaehr ghappent iss 1915 in Langschwamm Taunschip, Baricks Kaundi, PA.

Die Nochberschaftleit henn die zwee Meed die “Lumbeschweschdere” gheesse, weil sie aarem uffgebrocht waare un henn immer alt verhutzelte Gleeder geworre. Awwer, die seeme Nochbersleit henn die Meed aa gedauert un als schee rausgholfe. Sie henn die Meed oftmols Grumbiere odder Welschkann gewwe, un an die Butcherszeit, sie Pannhaas gewwe.

Die Jane un die Ang waare zwee leddiche Schweschdere. Die Ang ihre geborne Name waar Angelina, awwer alliebber in die Gegend rum hot sie yuscht die Ang gheesse. Die Meed henn gewuhnt im Busch in en alt verloddert Haus, ass gschtanne hot uff en Faahrweg zwischich zwee groose Bauereie. Uff ee End vun daere Weg waar der Mennoah Lieser sei Bauerei neegscht an Henningsville. Uff es anner End der Fredericksville Weg. Die Jane un die Ang Ruppert henn do zwische drin gewuhnt. Der Faahrweg waar die meenscht Zeit geyuust warre fer Feierholz aus em Busch fahre. So der Weg waar gaar net hatt odder oftmols geyuust. Sell hot die Ang guud aagschtanne, weil sie aarick “leitschei” waar. Wann ebber der Weg kumme iss, hot sie sich ariyets verschteckelt. Die Leit henn eewe gsaat, wie die Ang yung waar, iss sie in Lieb gfalle gewesst mit en yunger Kall, ass nix dewaert waar. Glei iss sie im me Familieweg kumme, un er iss sie fattgschprunge. Sie hot es Bobbli ghatt, awwer es iss sie yung gschtarewe. Sitter selli Zeit hot sie nix zu duh hawwe wolle mit die Leit un hot zu sich selwert ghalde. Sie iss net net vun Heem gange. Wann ebbes gebreicht waar, iss die Jane gange es hole. Des hot die Jane eewe nix ausgemacht, wann sie Leit aagedroffe hot. Sie hot gegliche zu schwetze un waar aa wennich wunnerfitzich dezu.

Neegscht an Henningsville, uff mei Grememm ihre Bauerei, hot mei Groossonkel, der Charl Schumacher, en glee Beckerei ghatt. Alle zwee Woche iss die Jane geloffe kumme zu daere Beckerei fer alt Brot un alder Kuche kaafe. Sie iss als kumme mit en alt verlumbert Fruchtsack un hot’s uffgfillt mit alt un uffgedattne Brot un Weck fer mit Heem nemme. Alsemol hot der Charl sie zehe Bens gfrogt, awwer gwehnlich hot er sie gedauert un hot sie’s yuscht fer nix gewwe.

Gwehnlich, wie’s eewe waar sellemols mit die Weibsleit, iss die Jane bei die Grememm neigschtoppt fer wennich blaudre un die Neiichkeede vun Henningsville verzehle. Die Grememm hot die Jane aa gedauert un oftmols sie eigelaade fer’s owetesse. Die Jane waar eewe glee, dinn un hot aarmseelich geguckt. Awwer wie sie an der Disch kumme iss, hot sie esse kenne wie en verhungerter Gnecht! Naaach em Esse hot sie immer schee gholfe fer der Disch abraame un Gscharr wesche.

Ee Summerowet, wie die Jane noch bei die Grememm waar, hot’s en wieschder Gwidderschtarem gewwe; noh eens noch enanner, un’s hot net eigewwe wolle. Es hot aa hatt gereggert mit yeder Schtarem. Die Gremmem hot zu die Jane gsaat, sie sett iwwer Nacht bleiwe un browiere fer Heem laafe in die Widdring. Des hot noch hatt gereggert, wie sie ins Bett gange sinn, un die Jane hot uff der “Settie” gschlofe in die Kich. Mariyets, wie die Grememm uffgschtanne iss, waar die Jane un ihr Fruchtsack fatt. Paar Daag derno hot die Grememm gsehne in en Koppli mit anner Wexel in ihrer Kicheschank. Die Grememm hot’s der Charl verzehlt, awwer niemand schunscht un naach sellem waar nix weiders gsaat dewehe. Die Jane iss noch alle paar Woche kumme fer alt Backnesach hole. Sie waar awwer allerdings nimmi eigelaade fer iwwer Nacht bleiwe.

Yaahre lang naach sellem iss die Jane un noh die Ang gschtarewe. Es waar eewe kenn neegscht Familie odder Freindschaft, awwer en zwedder Cousin vun Boyerschteddel iss beikumme fer die Leichte versariye. Naach die Ang ihre Leicht iss er darich die Meed ihr Haus gange. Es waar noh die Saag, ass daere Cousin en Haffe voll Gold un Silwerschticker gfunne hot, ass verschteckelt waar in die Meed ihre Holzkischt. Sell iss, wie die Gschicht verzehlt waar zu mir.

Peter V. Fritsch (Alburtis, PA)

(Sell Schtick waar gelese in Kutzeschtettel uff die Seminary Stage in Auguscht 2010.)

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s