‘S KATZ DEITSCH SCHTICK: November 2010

‘S iss Schpootyaahr im Daal

Die Walniss sinn am droppse,
Geb acht, ya net uff dei Kopp,
Un wann sie duhne, grickscht en guuder Gnopp.

Die Keschte sinn am falle,
Sie henn en schtechlich Schaal,
Awwer wann sie gekocht sinn, schmacke sie bescht vun all.

Die Bledder drehe viel Farewe nau,
Die Essichbeem sinn so rot.
Die Schtengel schtehne noch un sinn ya doot.

‘S iss Schpootyaar im Daal.

Die Gricke laafe ruhich un schtill,
Die Fisch schwimme frei un sinn so schee,
Du Buwe welle nau hunde geh.

Die Haase sinn guut gewold,
Die Hasch sinn nau am briehe,
Die Hunder schwetze viel un duhne wennich liehe.

Der Wind blost iwwer die Hawwerschtobble,
Die Keffer fliehe nimmi meh.
Mer misse uns glei richte fer der Schnee.

‘S iss Schpootyaahr im Daal.

Der Welschkann schteht noch im Feld.
Mer misse ins Feld fer es baschte,
Verlier dich net uff em letz Kaschte.

Mer misse der Holzschopp fille,
Grick die Saeg un such paar Bleck.
Was der Wind umgeblose hot, muss nau weg.

Die Geil sinn alle wollich,
Der letscht Load Hoi iss nau im Scheier.
Mer hoffe, ass es gebt kenn Feier.

‘S iss Schpootyaahr im Daal.

Die Fix hunde in die Felder.
‘S iss nau Zeit fer Falle setze.
Die Fix sinn schlau un duhne uns retze.

Die Gens fliege gehe Middag.
Sie fliege in en grooss Drupp.
‘S iss nau glei Zeit fer der Schpook.

Der Seidermiehl iss nau am schpringe.
die Ebbel kumme rei un sinn so siess.
Wammer zu viel Seider sauft, schlagt’s ehm vun die Fiess.

‘S iss Schpootyaahr im Daal.

Ya, der Summer iss nau vorbei.
Die Harreveggel sinn am greische.
Ich glaab, bis Mariye frieh hemmer en Reife.

Die Schwatzveggel henn sich nau gsammelt.
Sie fliege iwwer der Barick.
Sie mache viel Yacht, ‘s iss aarriyer ass aarick.

Der Schtroh iss all vum Feld.
‘S leit kenns meh im Feld.
Gott waar barmhatzich iwwer die ganz Welt.

‘S iss Schpotyaahr im Daal.

Richard Savidge
(Hegins, PA)

Seller Text waar gelese beim Kutzeschtettel Folk Festival im Tschulei 2010 uff die Seminary Stage.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s