‘S KATZ DEITSCH SCHTICK: Neiyaahrsowed 2010

Wie mer Neiyaahr feiert im alde Land

Ich bin vun Yarick Kaundi (PA), awwer Yaahre zerick hawwich in Heidelbarick (Deitschland) gewuhnt, un fer sell will ich ebbes schreiwe iwwer die Gebreiche im alte Land. Well, fange mir mol aa graad vum Aafang – mit em Neiyaahrsowed uff der 31. vun Disember (der Grischtmunet). Ei, ei, ei! Was waar des awwer far en verdeihenkerti, yachtichi Zeit g‘wesst do in Heidelbarick rum!
‘S erscht welle mir eich en wennich hoochdeitschi “Information” gewwe wegge seller Daag, un was es meent do rum. Wie dihr verleicht schunt g’heert henn, der Neiyaahrsowed heesst “Silvester” odder “Silvesterabend (Owed)” do in Deitschland in die hoochdeitsch Schprooch. Nau, sell waar der Naame g’wesst vum ‘me alder kadollischer heilicher Mann, wu gelebt g’hatt hot so um die 1,700 Yaahr zerick. Der St. Silvester waar eens vun die erschte Bishops vun Rome in die Yaahre 314 bis 335 AD. Un sei Feschtdaag kummt heidichsdaags graad uff der eenundreissichscht vun Disember. All die Deitschlenner do, sie saage “Silvester”, un sie meene der Neiyaahrsowed. Nau, was duhne die Deitschlenner uff der Neiyaahrsowed?
Fer’s erscht winsche sie ennanner “en guder Rutsch ins Neiyaahr!” Sell iss, was sie saage zu ihre Freind un zu anneri Leit, ass sie bekannt sinn mit. “En guder Rutsch ins Nei Yaahr” meent, sie sette en gudi, blessierlichi Zeit hawwe uff Neiyaahrsowed. Net zu wennich, net zu viel, yuscht graad genunk Hallichkeet fer en guudi Zeit hawwe – unni dass der Boliesmann der Weg kummt fer ehm eilaade, die Nacht schpende datt in die Staeschen. Well, wie dutt mer guud rutsche ins Neiyaahr? Was deet dihr nau denke? Fer die Wahret saage, en latt, was aageht do uff der Neiyaahrsowed, iss aardlich, wie es iss bei uns deheem in Amerika.
En latt vun die Deitschlenner, verleicht iewen die menschte vun ‘ne, sie bleiwe schee deheem seller Owed – am wennichschte bis Halbnacht. Aardlich viel vun ‘ne duhne deel vun die Freindschaft eilaade odder vun ihre guudi Freind fer die Zeit blessierlich schpende beinanner deheem. Mer hockt sich anne in die vedderscht Schtub un dutt Musick abhariche odder Musick schpiele odder Singschticker singe. Es gebt ferkummen en Neiyaahrs Prograem im Guck-Bax, un en latt Leit watsche sell. Un mer esst ebbes abbadich Guudes, un mer drinkt ewennich ebbes fer sich “uff-tuune” (un fer hallich warre) – ferkummen Wei un Schampayn. Mer will in guuder Mut kumme un sich reddi gricke fer es Neiyaahr begriesse, wann’s endlich mol do iss.
En latt anneri Leit gehne naus fer der ganz Owed zubringe im’ me Essblatz. Es hot blendi vun Restaurants un Wattsheiser un Klubs un so dergleich do in Deitschland, wu en abbadicher Neiyaahrsprograem aagebodde watt uff der 31scht Disember. Ebaut ‘s seem wie bei uns in
die Schtaets. Es gebt Musick, Danzes un anneri Sadde G’schpass. Un uff kors, alles geht bis schpoot in die Nacht nei. Die yungi Leit, denk ich, un anneri, wu mehner Geld henn fer schpende (odder weckschmeisse), selli gehne abbadich uff Neiyaahrsowed naus in so Bletz. Awwer iewen die, wu schee deheem bleiwe, selli Leit duhne aa zimml i ch “rutschich” warre gehich Halbnacht. Un wann die Uhr reddi iss fer zwelf Mol schlaage, noh brecht ‘s los. Ya, es dutt iwwerall aafange gnalle un grache! Wammer net besser wisse deet, kennt mer yo denke, der alt Deihenker – der Deifel – waer selwert um der Weg graad an die Zeit vum Yaahr! Un dass blendi vun seini Mithelfer am rumschpringe sinn datt draus in die kald, duschber Nacht! Nee, mir sinn des Ding doh nau yuscht ewennich am iwwerdreiwe
(un exaedschereede)! Awwer yuscht fer G’schpass – unn nix fer unguud.
Ennicher, mer kann beschuur iwwerall sehne, ass es Neiyaahr endlich mol do iss! Groossi Drupp Leit un ganzi Familie gehne naus in der Hof odder laafe nuff un nunner uff ’em Gehweg odder in die Schtrooss. Die menschte henn Verstand g’hatt un henn sich schee warm aageduh ghatt unn eigebindelt in dicki Windergleeder mit Hut uff ’em Kopp, Hensching uff die Hend, un Winderschtiffel uff die Fiess. Anneri Leit – abbadich die yungi Kalls, wu verleicht mehner “antifreeze” gedrunke g’hatt henn, ass notwennich waer – fer sich reddi gricke fer naus in die kalt Luft – sie dschumpe un schpringe rum wie net gscheit – ass wann’s schunt Summerzeit waer. Die ganzi Latt vun ‘ne – guudi Familieleit un narrische Nixnutze – sie gehne all an die Arewet, nemme ihre Maetches raus un schtecke un zinde ihre Feierwaricks aa! Ya, es geht noht los iwwerallich do rum. Die Funke- Schtecklin sinn schee am glitzere. Die grossi Feierwaricks – Rockets un so dergleich – sie gehne hoch in der duschber Himmel nuff. Noh bloose sie uff, ass es dunnert! Un mer guckt nuff un sehnt der Himmel voll Schtanne vun alle Sadde Fareb. Wuewwer, ass mer hieguckt – ganz um sich rum -, sehnt un heert mer die Dinger am abgeh. Un es geht seller Weg fer weit mehner ass en Schtund! In Faekt, deel Leit fange aa mit ihre Narrischkeede lang eb die Halbnacht, un anneri sinn ihre Dummheede am fatt mache bis dief in die Nacht nei. Wie g’saat, der Neiyaahrsowed do in Deitschland iss zimmlich, wie es iss bei uns – ee Weg odder der anner. Sie duhne yuscht, so scheint’s, zwee vun unseri groossi Feierdaage halde doh uff der seem Daag – der Neiyaahrsowed un unser viert Tschulei!
Ya, die Deitschlenner gleiche en aardlichi groossi Yacht mache uff ihre “Silvesternacht.” Deel Leit saage – un ich hab’s aa amelents im ‘me Buch gelese – sie henn aag’fange g’hatt, des zu duh schunt hunnerde vun Yaahre zerick – fer browiere, der kalt Winder fatt yaage. (Nau wann ich net letz bin, deel vun die aldi Pennsylvaanisch-Deitsche henn aa gegliche Yacht mache als in die Nacht uff’s Neiyaahr. Sell waar unser ald Gebrauch, ass g’heesse hot, ‘s Neiyaahr aaschiesse (odder einschiesse). Mer kann’s verleicht als noch heere in deel Bletz draus im Land in Pennsylvaani, wie die Kalls nausgehne ihre Schrotflinde abschiesse, wann die Uhr zwelf schlaagt. Sell henn mir als g’heert g’hatt wie mir noch yung g’wesst waare draus in die Hiwwele vun Nadd Yarrick Kaundi. Ennicher, dihr kennt guud denke, ass der erscht vun Yenner en abbadicher ruhicher Daag watt.

Butch Reigart
Columbia (PA)

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s