‘S KATZ DEITSCH SCHTICK: Matz 2011

Es Florida Wasser

Es waar mol en Bauer in Baricks Kaundi, der hot aagfange mit wennich Geld. Awwer er un sei Fraa henn hatt gschafft, henn en grosse Familie uffgezogge, ihre Geld gschpaart, un henn ihre Bauerei abbezahlt. Noht henn sie noch en Bauerei gekaaft und bezahlt, un iwwer en Weil noch eeni. Wie sie zimmlich alt waare, henn sie en gleenes haus gekaaft in eens vun unsere Schtettel, sinn neigezogge un henn ihre Kinner uff die Bauerei glosst.
Mol ee Daag waar die Sally, die eldscht vun ihre Meed, uff de Penn Schtrooss in Reading. Sie hot gewaart uff en Bus vor‘m Capt. Dill seinre Travel Office. Sie hot ins Genschter geguckt un hot gleene Bicher gsehne, ass saage vun die unnerschiddliche Bletz in der Welt, wu er Tickets verkaaft hot fer hiegeh. Sie iss neigloffe un hot deel grickt vun de Bicher. Eens hot gsaagt vun dem Florida Wasser, wie wunnerbaar guud, ass es iss. Mir wisse noch all, wie mir in die Schul gange sinn, hen mir glannt vun dem Ponce de Leon un die Ewiche Yuchend Schpring in Florida.
Well, des Buch hot gsaat, ass sie hedde noch des seem Wasser in Florida. Wammer es drinke deet un sich wsche mit, hot‘s gsaat, deet mer widder yung warre. Dann hot sie en Notion grickt, des waer yuscht der Blatz fer der Paep un die Memm mol hiegeh. Sie hot es der Memm ausglegt un hot gsaat: „Ferwas gehscht du un der Paep net mol naach Florida der Winder? Dihr hennt immer hatt gschafft un waart nie net viel rum kumme in der Welt.“
Die Memm iss eigschtimmt mit der Sally, un noht hot der Paep mitgeh misse. Sie sinn so aafangs November naach Florida, naach Miami. Glei hot sie der Sally gschriwwe un gsaat, wie wunnerbaar des Wasser iss. Sie hot gsaat, sie un der Paep deete widder viel yinger fiehle. Dann eemol ee Daag hot die Memm widder gschriwwe un hot gsaat zu der Sally, ferwas sie un der John net mol runner naach Florida kumme deete. Sie hot gsaat, naach der Grischtdaage, wann es Butschere verbei iss, sedde sie mol paar Woche runner kumme. Ihre Kinner kennte acht gewwe uff die Bauerei. Dann hot die Sally die Notion grickt, un noht hot der John aa mitgeh miss.
Paar Daag ver Nei Yaahr sinn sie darich nunner naach Florida. Wie sie naach Miami an die Riggelweg Station kumme sinn, henn sie eckschpeckt, der Paep un die Memm zu „miete“, awwer es waar niemand datt. Dann henn sie gedenkt, ass es verleicht letz verschtanne waar, un sie deete en Taxi gricke un ans Wattshaus fahre, wu der Paep un die Memm waare.
Wie sie um‘s Eck vun der Station sinn fer en Taxi, hot en yungi Fraa datt gschtanne mit me Bobbeli uff em Aarm. Die yung Fraa hot gsaat: „Sally!“
Die Sally hot sie mol aageguckt un hot gsaat: „Well, wer bischt du? Ich hab dich noch nie net gsehne devor.“ „Wei,“ hot sie gsaat, „ich bin die Memm!“
„Well, Gott im Himmel, Memm,“ hot die Sally gsaat, „was iss ir dann des?“
„Wei,“ hot sie gsaat, „es iss des Wasser. Sitter ass ich es drink un mich alle Daag wesch demit, bin ich so warre.“
„Well,“ hot die Sally gsaat, „des heet ich mir selwer net geglaabt! Awwer Memm, wem sei Bobbeli hoscht du dann uff em Aarm?“
„Ach,“ hot die Memm gsaat, „des iss kenn Bobbeli, des iss der Paep. Du weescht, er hot immer so viel Wasser gedrunke, un des Florida Wasser hot ihn widder so yung gmacht.“

Anonymous

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s