‘S KATZ DEITSCH SCHTICK

Uff Bsuch bei die Groosseldre

Ich glaab, mir alle, wennigschtens die Leit, wu so um 55 oder meh Yaahr alt sin, misse zugewwe, as mir efters an die vergangni Zeite draame. Ich weess sicher, as ich eens von selle bin. ‘S is en guder Zeitverbrauch, weil die Erinnringe sin ebbes, was es Lewe siess macht. Un mir alle breiche scheene Bilder un Gfiehle, as dezu verbunne sin, die Sarige vun heit zu iwwerkumme. Ich denk, mir sette uns devun gewiss nett schemme. Es drickt uns aa, an die Deemiedichkeet zu denke. Die sinn aa wichtich as en Deel vun uns Pennsylfaanisch-Deitsche.
Wie ich en gleener Springer waar, meind ich noch gut, hawwich viel Zeit mit meine Grosseldere verbracht. Sie hen gaar net weit vun uns gwuhnt, un ich hab allee zu ihne zu Fiess gehe kenne. Awwer fer en Sexyahriger waar sell en grosses Abendeier, allee zu laafe. Ich waar eens vun die yingere Kinskinner, un die Grammy un der Pappy waare schun alt. Der Grunn defier waar, as mei Mudder selwert die zwettyingscht vun acht Kinner waar.
Mei Schteddel waar en gleener Taun wie en latt annere im Lechaadaal in den fimfziger Yaahre. Un wie ich uffgwaxe bin, waare alle Leit so meh oder wennicher naemlich. Es hot wennich reiche und aa net viel aareme Leit gewwe. Datt waar aa fer uns Kinner en sichrer Blatz. Alle henn enanner gekennt.
Ich hab aarig viel Zeit mit denne Grosseldere verbrocht, weil mir henn aa vier Kinner in meine Familiye ghatt, un mei Eldere henn schaffe misse. Mei Daadi waar nach em Weltgrieg viele Yaahre bei der Riggelbahn, un die Memm hot gschafft bei der Gleedermiehl un aa bei ‘me Dockder as Secretary.
Mei Grossmemm waar die Alice Helena Flick Yoder Frey. Sie hot selwert en hattes Lewe ghatt. Sie waar leddicheweis gebore. Uff ihr Daufschein sinn „diesen beiden Ehegatten“ ausgestriche warre, un „diesen gezeichneten“ eigschriwwe. Ihre Mudder waar Hausmaad un hot sich mit em Suh vum Haus befreindet. Die zwee henn net gheiert, awwer die Alice hot ihr nadierlicher Vadder efters gsehne un hot sogar sei Naame “Yoder” gedraage. Dem Mann sei Eldere henn en Schtor in Bethlehem gfiehrt. Die Alice ihr Mudder hot net lang denooch gheiert, un mit ihrem neie Ehemann hot sie drei annere Dechder zur Welt gebrocht. Mei Grossmemm ihre Mudder hot Mary Flick gheesse un is aus Moore Taunschip in Naddhampton Kaunti gschtammt. Ihre Voreldere hen frieh datt gsiedelt un sin spooter naach Bath gezoge.
Die Alice hot ihr Kinner zur Welt gebrocht vor un naach em erschte Weltgrieg. Sie sinn in die Depressionyaahre uffgwaxe. Sell hot gewiss en grosse Eedruck uff sie gmacht, ebbes as sie en lewelang wegdevun gnumme henn. Sie henn gelannt selbschtennig zu sei, hatt zu schaffe un annere Leit zu helfe. Die ganz Familiye waar sehr spaarsam, kenner zu hochmiedich. Die Alice waar en begabti Naehern un hot all die Kinner ihre Gleeder gemacht. Maag aa sei, sie hen ken Geld dafier gehatt, ihr eegne zu kaafe. Die Leit in der Nochbaarschaft waare allfatt am schtaune, wie sie aus neegscht nix die Mentel, Hemde un Rucke hot erschaffe kenne.
Die Alice ihr Mann waar der Elmo Frey. Er waar en Boss bei dem Zementmiehl. Sell waar en guter Tschabb, awwer acht gleene Meiler im Haus zu fiedere waar aa ken gleeni Arewet. Sie henn ihr Gaarde ghatt. Ich meind noch gut, wie sie selwert Pasching, Chow-Chow, geele Buhne un annere Sache eigemacht hot. Alles hot sie zuerscht uff em Offe sauwer mache misse – die Masongleeser mit dene Gammringe un die Deckli. Alles hot sie noht so addentlich uff Schafde in den feichte, dunkle, und staubige Keller uffgstellt. Ihr Rhubarber-, Rosine-, Siesskasche-, unn Schnitzboie hot sie aa datt in en Henklaade uffbewahrt. Der Draahtkaschde waar fer die Micke wegzuhalte. Es hot en Dier devor ghatt, mit em Latch. Driwwer waar als Stickli Duch. Awwer es allerbescht, was ich gesse hab, waare ihr Melassichkichli und ihre Slapjacks. Die Kichli hot sie in ihrm Essschank versteckt. Sie waare in em Kemmerli in der Kich. Sell waar die Schatztruh fer uns Kinner. Allemol, as ich Bsuch gmacht hab, hawwich glei gucke misse, eb ebbes in die Zinnbaxe mit Waxbabier am waarte waar. Mit kalde Milich waar sell ebbes fer mich, saag ich eich. Un naach em Boibackes hots allfatt iwweriche Gruschtteig gewwe. Im Offe gebacke mit glee bissel Budder druff, mit Zimmit un Zucker dezu, henn die Slapjacks es ganz Haus glockert. Ich kann sie noch rieche – ihr net?
‘S waar bei ihr allfatt ebbes am geh! Der Pappy waar in die Garage am Saege, odder am ebbes flicke. Sie waar am Biggle, Abwesche odder am Koche. Wie ich elder warre bin, henn sie mir erlaubt, die Raase maehe fer en vaddel Dahler! Es Luschtigschte dabei waar, wann Aprikose dicht alliwwer am Boddem glege sinn, wie ich hab maehe misse.
Un bei ihr waare stennich Leit am bletzlich neischtobbe, abbadich die Freindschaft: Tante, Onkels, ihre Kinner, Freinde, Nochbere, Kusine, Bekannde. Do hemmer Deitsch gheert! Mir Kinner henn net recht gwisst, was sie gschwetzt un geblaudert henn, awwer mir henn gedenkt, as es en Zaubersprooch sei muss mit magische Wadde. Un ich denk, es sin aa heit magische Wadde, weil sie henn der Klang un die Graft, uns zu en annere Zeit zu bringe un uns glicklich in unsre Draame mache.

Ed Quinter (Allentown, PA)

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s