‘S KATZ DEITSCH SCHTICK: September 2011

Wie mir der Meerreddich gemacht henn

Yaahre zerick an der Grischtdaagzeit hawwich en ganz guder Meerreddich an meim Schwaerdaadi seim Haus ghatt.  Die Aage waare am Wessere, die Naas iss uffgemacht warre un der Schwitz hot uff der Schtaern in gleene Drobbe gschtanne.  Ich hab ihn gfroogt wu er es kaaft hot ghatt, un er hot geantwatt, ass seller in seim Gaarde gewaxe waar un er selwert es gemacht hot. Ich hab aa an sellre Zeit en Gaarde in meim hinnerschde Hof ghatt, un es neegscht Yaahr hot mei Schwaerdaadi en paar Watzle runnergebrocht un ich hab sie neigeschteckt in en Eck vun meim Gaarde drin.

Wann’s Zeit im Schpotyaahr waar fer der Meerreddich zu duh, iss mei Schwaerdaadi runnerkumme mit seim eegne Essich un Zucker. Naachdem ass ich sie ausgeroppt un gewesche hab, sinn mir in die Kich neigange fer der Meerreddich zu mache. Ich hab kenn Meereddichreiwer ghatt, awwer mei Fraa hot eens vun selle neie essegschrodne Machine kaaft en paar Munete zerick. Ich hab der Meerreddich neigeduh un hab die Machine aagedreht. Oh Elend! Waar der Geruch awwer schtarick! Ich hab nasse Aage ghatt, un es Wasser waar an mei Gsicht am Nunnerlaafe. Mei Schwaerdaadi, wu wie ich aa ganz nasse Aage ghatt hab, hot gegrische, „Mach die Fenschdere uff; mir misse en bissel Luft hawwe dodrin.“  Es waar aarich letz, un sell hot net zu viel gholfe.

Um selli Zeit drum iss mei Bu vun der Schul heemkumme. Er iss in die Kich reigeloffe un hot gsaagt, ass er am Lache waar, „Ich meen, ass des die eerschti Zeit waer, ass ich zwee uffgewaxne Mannsleit allebeed am Brille gsehne hab.“  Schpeeder, wann mehner Luft reikumme iss, hot mei Schwaerdaadi der Essich un der Zucker nei un hot’s faddich gemacht.  Er hot net kenn Reseet gebraucht; er hot yuscht es gschmackt un en bissel vum Essich odder Zucker neigeduh, bis es recht waar. Un ich muss eich saage: Sell hot gut gschmackt, wann mir’s uff’s Schunkefleesch geduh henn.  Es waar Druwwelwaert fer es zu mache.

Es neegscht Mol, ass ich mei Mudder bsucht hab, hawwich sie die Gschicht verzehlt. Un was hot sie gsaagt?  „Du Dummkopp! Weescht net, ass du der Meerreddichreiwer ausewennich am Hof yuuse muscht?“  Ich meen, ich waer fer en bissel Mitleid am Suche gwesst, awwer ich hab ebbes schunscht grickt.

Es wunnert eich verleicht, wie es gange iss es neegscht Yaahr. Nau, muss ich eich wisse losse, ass mir en Hundli ghatt hen. Eemol der neegscht Summer hawwich der Boomer, wie mir ihn gheese henn, draus im hinnerschte Hof gsehne. Datt hot er an’s Eck vum Gaarde gschtanne, wu mir frieher der Meerreddich geblantzt ghatt henn, un er hot eens vun seine hinnerschte Beh uff in der Heh ghatt. Muss ich meh saage? Sell waar es letscht vum Meerreddich im Gaarde fer mich. Nau, gehen ich yuscht zum Schtor un kaaf’s, wie all die annere Leit duhne!

Larry Gradwohl

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s