‘S KATZ DEITSCH SCHTICK

Heem geh

Im Munet Abril bin ich widdermol heemgange, heem in die alde, reformierde Karrich. Bin schunn lang nimmi dahie gereest, datt wu ich uffgwaxe bin. Die Groosseldre sinn aa vun datt gewest, so wie aa mei Groosseldre ihre Voreldre. Mei Paepp hot sei Abschied vun uns vor ebbes 14 Yaahr zerick gnumme. Awwer er iss immer noch do, abbadich wann ich hiefaahr un an ihn un die alde Zeite denk. Er ruhgt nau im Karichhof in Druckeland in Nieder Nazareth Taunschipp. Fer ihn waar’s wichdich, ass mir Kinner unsre yingere Yaahre in dem Gebei viel Zeit verbringe daede, um zu zeidiche un unnich denne Leit zu sei, ass nau newwich mir hocke.
Awwer nau bin ich kumme mit meinre Memm zu sei, un newwich ihr hocke. Alles schickt sich viel gleener ass wie ich mich erinner. Es gross Glaasfenschder iwwer em Aldar iss wie en alder Freind, widdergedroffe. ‘S iss wie en lieses Piickter aus em Kinnerbuch mit Biwwelschtories, ass mir als emol glese henn. Uff em Schtee hockt der Heiland am me Hiwwel unnich em Baam, mit ausgschtreckte Aarme heesst er die Gleene solle zu ihm kumme. Die Eldre bringe ihre Kinner zu ihm un sie sedde sich net farrichde. Der Herr hot en ruhiges Lechel. ‘S iss en Ermaahning, ass mir yedre Zeit gebodde watt vun Yesus, zu ihm zu kumme, eb gross odder glee, yung odder alt. Un in der Biwwel watt gschriwwe, mer kummt net darich em Himmel sei Dier, wann mer net en schtaricker un unschuldicher Glaawe wie die Kinner hot.
Wie ich datt mit meinre Memm ghockt hab, hot’s mich gedrickt, ass ich umgeguckt hab un gsehne hab, wie nau all die alde Leit aa wie Kinner aussehne. Glaar waar’s wie en Deich voll silwerhaarige Kepp, awwer die Gsichter henn seidich, kinnisch geguckt, friedlich un unschuldich. Ich hab sie erkennt, un sie mich. Dieweil die Memm ball 86 Yaahr alt watt, weess ich net, wieviel mol ich ihre siessi Schtimm noch heere deet kenne bei em Saage vun em Herr seim Gebet, beim Glaawesbekenntnis, un bei denne scheene, alde Lieder.
‘S iss ferschur waahr, was gsaagt watt – die Zeit watt katzer.

Ed Quinter

One response to “‘S KATZ DEITSCH SCHTICK

  1. Der Ed hot arrig gut geduh!

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s