‘S KATZ DEITSCH SCHTICK

‘S iss Winder im Daal

Die Bledder sinn nau hunne,
Sie rapple, wammer darich laaft.
Der Siesswelschkann iss nau all verkaaft.

Der Grund iss nau gfrore,
‘S duht nix meh waxe.
Awwer ich heer die Hinkel noch gaxe.

Die Haase sinn am huppse,
Ich heer der Welschhahne graehe.
Ich glaab, bis mariye frieh hemmer Rege.

‘S iss Winder im Daal.

Der Daadi saagt, „’S iss zu kalt fer Rege gewwe,
Guck mol yuscht zum Fenschter naus.“
Er iss recht, ‘s gebt nau Schnee drauss.

Die Micke sinn net zu wiescht,
Die Keffer fliege nimmi meh.
Ich glaab, bis maryie frieh hemmer Schnee.

Der Ox iss nau guud un fett,
‘S iss glei Zeit fer ihn schlachte.
Huddel dich, ‘s iss naach der Achte.

‘S iss Winder im Daal.

Grick der Iwwerrock raus,
Der Schnee leit uff der Hiwwel.
Geh nuff uff der Schpeicher un grick die Schtiwwel.

Der Schnee iss nau sex Zoll dief,
‘S hot alles zugedeckt.
Nau sehnt mer kenn Dreck.

Mer muss nau Brennholz reihole.
Geh naus zu der Holzshop.
Vergess net die Hut fer die Kopp.

‘S iss Winder im Daal.

Dankdaag iss glei do.
Geh naus un such der Welschhahne.
Mer sette aa gucke fer der Fahne.

Grick die Siessgrumbiere vum Keller.
Sie sette noch guud sei.
Wann net, fieder sie zu die Sei.

Die Buwe sinn nau am Falle setze,
Sie gehne fer Muschgrotte an die Grick.
Sie hoffe, sie sinn mit Glick.

‘S iss Winder im Daal.

‘S iss Zeit fer die Loos schlachte,
Grick es Hackmesser un fang aa hacke.
Ich kann die Schunke nau schunt schmacke.

Die Meed welle Schtricktaffe mache.
Sie schmiere die Hend mit Budder.
Grick kenns uff die Frack odder du heerscht vun die Mudder!

Die Memm iss bissi am quilte.
Sie macht viel Schtich uff der Deppich.
En latt Weibsleit kumme, un sinn kenns leddich.

‘S iss Winder im Daal

Der Daadi hockt uff sei Schockelschtuhl.
Er hockt mit die Fiess in die Heh.
Der Daag iss er drin, er schafft nimmi meh.

‘S iss nau glei Grischtdaag.
Grick der Gaul Halt an der Zaam.
Mer gehne nau fer der Grischtdaagsbaam.

Alles iss schee ruhich im Haus.
Der Hund leit vanne am Feierblatz.
‘S iss gaar kenn Blatz fer die Katz.

‘S iss Winder im Daal.

Richard Savidge

(Sell Gedicht hot letscht Wochend beim 59th
Paelzisch Mudderschproochschreiwer-Contest 2011
der erscht “Hiwwe wie Driwwe Award” grickt.
Congratulations zum Richard Savidge!)

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s