‘S KATZ DEITSCH SCHTICK

‘S Neiyaahr aaschiesse

Ball naach Grischtdaag is es Neiyaahr aagschosse warre. En paar yungi Mannsleit sin am Owet vum 31. Disember minanner in der Nochberschaft rumgange mit ihre Flinde un hen an yedem Haus des nei Yaahr aagschosse. Ich hab die Sach lang net verschteh kenne. Ich hab als gemeent, es waer schicklicher zu saage, des alt Yaahr dootschiesse wie des nei Yaahr aaschiesse. Die Kinner hen widder owets gewatscht wie am Grischtowet, do hot’s uff emol am Hauseck gegracht, un all hen gewisst, was es meent. Glei druff is der Paep nausgange un hot de Neiyaahrschitz gsaat, sie sodde reikumme. Sell hen sie aa geduh, un sie sin gedriet warre zu Kuche, Ebbel un Seider. Wie sie gesse un gedrunke hen ghat, sin sie uff un fatt. Der Paep hot gsaat: “Was is eier Hurry?” Die Antwatt waar: “Mer misse’s Neiyaahr noch aaschiesse ans Schmitte, ans Katzemoyer’s un en halb Dutzend annere Bletz.” Un sie waare fatt. Ich hab die Sach net verschteh kenne un waar zu bleed fer zu froge fer en Explanation. Ich hab awwer lang die Nooschen ghat, dass wann’s net fer die Schitz waer, kennt’s nei Yaahr net kumme, awwer wie des Schiesse helfe daet, waar weit iwwer meim Begriff. Seller Gebrauch is aa ausgschtarewe, un an seim Blatz hot mer in viel Gegende Neiyaahr Parties un Frolics, die mehner Blessier gewwe. Die Leit warre eewe als gscheider, eb sie awwer aa besser sin wie veralders, kann ich net ferschur saage. Frieher hot mer’s Neiyaahr aagschosse; alleweil watt’s oft aagsoffe.

Daniel Miller (1843-1913)

Der HwD Drucker winscht alliebber
im neie un im alte Land
en guud un gsund nei Yaahr 2012!

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s