‘S KATZ DEITSCH SCHTICK

En Telephone kann sell duh!

Wie ich en Kind waar, hemmer zwee Telephones deheem uff ‘re Bauerei ghatt. Eens waar in der Kich un die annere waar in meine Eldre ihr Bettschtubb. Alle beed henn en Cord ghatt, un wammer ebber uffrufe wott, hot mer gemisst die Nummere auswennich wisse odder in em Telephonebuch gucke. Die Telephone hot kenne yuscht ee Ding duh: ebber uffrufe.
Schpeeder in mei Kindheet hemmer en Telephone mitaus en Cord grickt. Ich hab gedenkt, ass sell wunnerbaar waar. Mer hot kenne darich es Haus laafe un schwetze mit ebber uff ‘re Telephone! Dann, wie ich baut 18 Yaahr alt waar, hawwich mei aerschde Cell Phone grickt. Waar sell ebbes! Nau hawwich kenne in mei Maschine faahre un uff meinre Telephone schwetze! Awwer zu sellre Zeit hot mer mit die Cell Phones yuscht annere Leit uffrufe kenne. Well, heidesdaags iss sell net meh die Ruul.
Nau, die Froog iss: Was kenne unsere Telephones net duh? Gell? Letschte Woch bin ich zu meinre Verizon Schtor gange, weil es Zeit waar fer mei Vertrag zu erneie. Wammer sei Vertrag erneie muss, kammer en neie Telephone griege. Ich hab en neie iPhone gewaehlt.
Ich muss ehrlich saage, ass ich aarick uffgeregt waar fer en iPhone zu gricke. Die letschte zwee Yaahr hawwich en Blackberry ghatt. Blackeberries un iPhones sinn, was mir saage: “Gscheitphones”. Sell sinn Telephones, ass nadierlich Leit uffrufe kenne, awwer sie kenne so viel meh aa duh: E-Poscht checke, im Internet surfe, Pickters nemme, Vi-deos gucke un mache, Schpiele schpiele un meh un meh un meh.
Mei iPhone hot die Meeg-lichkeit vun iwwer 500,000 Apps zu waehle. 500,000! Harrieyesses Geschter hawwich mit meinre neie iPhone en wennich “geschpielt”. Ich hab en App gedownloadet, ass heesst: TuneIn. Sell iss en App, ass mir erlaabt Radio Stations vun alliwwer ‘re Welt zu heere!
Ya, uff mei Weg zu ‘re Arewet geschder, hawwich en Radio Station in Mainz, Deitschland abgharicht! Dann schpaeder geschdr-owed, hawwich mei gude Freind in Michigan uff-gerufe, awwer mir henn es desmol mit FaceTime gemacht. FaceTime iss waricklich ebbes! Ya, mir henn minanner gschwetzt, awwer mir henn aa mit unser Telephone enannere lewendich gsehne! Mit unsre Telephone un ihre Cameras, kennte mir enanner sehne un zur gleiche Zeit schwetze! Sell iss ya doch ebbes!
Wann ich zerick uff mei Kindheit denk, denk ich, ass alles so eefach waar. Un verleicht waar sell besser, awwer unser Technology kann aa guud duh! Ich bin schur, ass en latt Leit schun en Gscheitphone henn. Welle Apps gleicht dihr? Wollt dihr mit mir glee bissel FaceTime mache?

Douglas Madenford
Howard (PA)

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s