‘S Katz Deitsch Schtick: Vum Rege

Wann’s reggerich waar im Friehyaahr Yaahre zerick

Loss uns schwetze iwwer was zu duh uff en kalder, reggeriger Daag im Friehyaahr. Mir hen Yaahre zerick als Karepetlumpe gschnidde un zammegenaeht. Die waare no uff en groosser Balle gerollt fer zum Weewer odder zu der Kaundidscheel, wu die neie Karepet gemacht warre sin. Deel hen mir aa selwert gflochde un hen so runde Karepet rausgemacht fer uns. Mir hen als noch eens in unser Bettschtubb.
Hausbutze hot mer duh kenne—alles as wie die Karrepet naushenke uff der Weschlein fer gloppe. Schublaade hot mer gebutzt un neie Zeiding in die Schublaadboddem gelegt. Alle Boddem hen uffgewesche sei misse mit heemgemachde Seef. Die Wend hen aa abgewesche sei misse, so as alles schee sauwer waer bis es naegscht mol butze—im Schpotyahr.
Mer hot Niss rausgemacht: Walniss, Hickerniss. Un mer hot die geglobbt mit en Biggeleise un en Hammer. Mer hot es Eise im Schooss ghowe. Die Niss hen mer no rausgemacht vun die Schale mit en Sackmesser odder en Nisspick. Es waar schee fer so “Double Eagles,” was mir en ganze Helft vun en Hickernuss gheesse hen, rausmache. Die waare schee fer uff die Grischtdaagskichlicher zu dricke. Sie hen aa gude Kuche un Boi gemacht. Deel hen mir aa in Taffy gemacht, wann es aus Melassich gemacht waar odder brauner Zucker. Als emol hen mir Grundniss in der Melassich-Taffy. Mir hen aa als Pulltaffy gemacht.
Welschkann hen mir aa oft gscheelt uff reggeriche Daage. Wann die Kolwe darich der Welschkann-Schaeler gange sin, waare als noch paar Kanne uff die Grutze. Die hen mir all abgemacht. Un mer hot der Schaeler net zu schtarick drehe darefe; yuscht langsam genunk fer die Arewet hatter mache, schunscht waere noch viel meh Kanne uff die Grutze gelosst. Die Grutze hen mir im Offe verbrennt im Summer.
Mir hen aa als Grummbiere gschnidde fer blanze. Yeder Schtick hot en Aag hawwe misse. Die Brotpanne hen mer oft gebutzt mit Seefelock un Holzesch. Des hot mer im Weschheisel geduh. Messere hen mir aa gscharreft uff en Schleifschtee unnich em Vorschutz. Des waar als en gudi Zeit, der Garret zu hausbutze. Mir sin darich all die alde Sache gange, awwer nix waar nausgschmisse.
En reggericher Daag war aa en gudi Zeit fer Gleeder flicke. Es Geilgscharr hot mer butze kenne mit heess Wasser un Seef, un no hot mer’s gschmiert fer es lummerich mache. Wann es schteif warre is, dann hot’s Ledder glei Schprunge nei grickt, un es hot verreisse kenne.
Der Keller hot mer uff so en Daag butze kenne. All die Schpinnewewe hen vun die Balke gebutzt sei misse. Der Grundboddem hot gekehrt sei misse, die Henklaade fer es gekaennt Sach hen gewesche sei misse. Alles hot in Addning sei misse, fer es Sach, as vun der kummende Ern in der Keller gebrocht sei watt. Die menscht Zeit hot die Arewet gschafft sei kenne, wann’s gereggert hot odder net. Awwer mehner vun die Familie hen helfe kenne, wann sie ihre annere Tschabbss im Feld odder an die Scheier net duh hen kenne.

Norman C. Hoffman

One response to “‘S Katz Deitsch Schtick: Vum Rege

  1. Des is jo arg schä do bei eisch un es beschde is, als än Pälzer Bu versteh isch jedes Wort was ihr do schreibt. Des fiehlt sich ä bissl o wie uffm Woifeschd und ma härt die verschiedene Pälzer Dialekte uff ämol. Ä bissl Kaiserslautre, ä bissel Kusel un ä bissl Vorderpalz. Des is än große Schpass fa misch moin Dialekt do gschriwwe zu sehe als wäre des ä gonz normali Sproch.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s