‘S Katz Deitsch Schtick: Der Summer

Der Summer

Was hemmer uff der Summer gwaardt,
Mit Glaagerei vun alle Aart:
Der Schnee, die Kaelt, un so un so –
nau, endlich iss der Summer do!

Un mit der Summer kummt die Sunn,
Die Schmuddrichkeit, des schlagt ehm dumm.
Mit Micke un mit Gwidderschtaerm,
Un en Umzahl Ieme-Schwaerm.

Umleidlich iss des in de Hitz,
Un mer sinn ganz nass verschwitzt.
Die Micke graeddle uff ehm rum,
Unnich die heesse Summersunn.

Nau kummt der Dascht, mer hot kenn Ruh,
Muss immer saufe wie en Kuh.
Deel saufe Wasser, annere Bier.
Doch schier verdaschte duhne mir.

Luft-Kiehl Maschine un die Faenne
Schpringe, bis sie aa uffbrenne.
En kiehle Luft in en Gebei
duht guud – doch iss es schnell verbei.

Net immer hockt mer im me Haus,
Fer endlich muss mer widder raus.
Zu Micke un die Schmudderichkeit –
en Summerqual fer manniche Leit.

Ich denk vum Winder – lang verbei.
Heer der kalt Wind peife ums Gebei.
Seh Schnee fliege wie weisse Blitz …
Was will ich nau: Kaelt odder Hitz?

naach Ernest Waldo Bechtel (ca. 1983)

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s