‘S KATZ DEITSCH SCHTICK

Der erscht Grischtdaag

Im sellre Zeit is en Gebott vum Kaiser Auguschdus ausgange, as die ganz Welt eigschriwwe warre misst.  Es waar’s aerscht mol un is in der Zeit gschehne wu der Cyrenius Gowenier in Syrie waar.  Un alle mensche sin gange sich eischreiwe loss, yeder in sei eegeni Vadderschtadt.  Un Joseph vun Nazareth in Galilea hot sich aa uff Weg gemacht ins yiddische Land noch Davids Schtadt wu Bethlehem heest, weil er un sei Voreldre ewwer aus David’s Familye schtamme, so as er un sei Fraa, die Maria, wu in Familyeunschtende waar, ihre Naame aagewwe kennde.  Un wie sie datt aakumme waare, waar’s schunn die heechscht Zeit ihr Kind uff die Welt zu bringe.  Un ihr aerscht Bobbel waar en Buwli, un sie hot ihn in Windle eigewickelt un hot ihn in en Fudderdrog gelegt, weil ken Blatz waar in Waatshaus fer die Familye.

Im seeme Land waare Schoofhieder draus uff die Felder fer ihre Schoof hiede darrich die Nacht.  Do schteht uff eemol en Engel vum Himmel vor ne, un es ganz Feld waar vum Licht un Gottes Hallichkeit uffgeleicht.  Die Schoofhieder waare arrig vergelschtert, awwer der Engel saagt,  “Farricht eich net, weil Ich eich gude  un freeliche Noochrichde bring, eich un die ganz Welt: Heit is eich in der Schtadt David Grischtus, der Haerr, eier Heiland, gebore.  Un des soll eich en Zeeche sei.  Ihr kennt des Buwli in Windle eigewickelt im Fudderdrog am schloofe finne“  Un bletzlich waar es voll Engel vum Himmel um die Schoofhieder rum, un sie hen Gott gelobt un gsunge.  “Ehr sei Gott im Himmel hoch un do uff der Aerd Friede fer alle Mensche wu gude Wille hen.“  Un es waar net lang, do sin die Engel widder zerick in der Himmel.

Noh hen die Schoofhieder zu nanner gsaat, Loss uns graad noch Bethlehem geh un die Gschicht sehne as datt gschehne is, wu der Haerr uns bekannt gemacht hot.  Un sie hen sich gedummelt un hen die Maria un der Joseph un es Buwli am Schloofe im Fudderdrag gfunne.  Wie sie des Ding gsehne hen, hen sie’s iwwerall bekannt gemacht, was ihne gsaat is warre vum Heiliche Kind.  Alle wu es gheert hen, hen sich aerschtaunnt iwwer all die Sache as die Schoofhieder verzeehlt hen.  Awwer die Maria hot all die Sache zu sich selwer ghalde un dief in ihrem Hatz iwwerlegt.

Un die Schoofhieder sin heem gange un hen der Haerr gelobt un gedankt fer alles was sie gheert un gsehne hen wie es ihne verzeehlt waar.

Leonard E. Shupp

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s