Bisskatzemischt Kaffi
Ich weess net eb dihr devun gheert hedde, awwer’s gebt en Gedier in sudoscht Asien ass en Ziwwetkatz heest. Es schtellt sich heraus ass wammer zu denne Kaffibuhne fiedere deet, was raus kummt macht es bescht Koppche Kaffi in der Welt.
Nau, yeder epper wunnert sich wie sell am aerscht ausgefunne waar. Velleicht waar es en Woge. Awwer was iss hatter auszufiggere iss wie der zwette Kall eigschwetzt waar. “Nee, ‘siss warricklich gut! Browwier’s emol!”
Ennihau, es watt en grosses Ding, un heidesdaags bezaahle Leit nuff zum sechs hunnert Daaler fer en Koppche Ziwwetkatze Kaffi. Wann ich sell gheert hab, hawwich was zu duh gewusst.
Nau, Ziwwetkatze sinn hatt zu finne in Montgomery Kaundi, awwer ich hab glese ass sie zimmlich gleich as Bisskatze sinn, un mir henn blendi vun denne dorum. Es muss yuscht schaffe.
Doch hawwich paar Bisskatze gfange, unn zu denne Kaffibuhne gfiedert. Ich hab Paar Schtunne gewarte, fer die ihri Bisness zu duh, un hab bissel uffgebraut fer der Kaffi Klatsch am Faulkner Schwamm UCC Karrich. Ich hab deel Starbucks Babierkoppche grickt, un hab mei Bisskatze Mischt Kaffi unnerzuschiewe browiert.
Well, sell waar net zu gscheidt. Browiert des NET daheem! Der Kaffi waar net arrig, unn die elde Weibsleit henn sich net zu viel begraemt. Awwer loss mich eich saage, eenich Bisskatze Schtink ass ins Maul kummt, muss endlich vum hinnerscht End rauskumme.
Fer zwee Woche hawwich nix als Tamattensaft gedrunke misse. Em Dockder sei Ordning. All recht, es waar warricklich en “restraining order”, awwer doch.
Noh binnich nimmimeh en Geizhals gwest. Ich hab Paar waahrliche Ziwwetkatze kaaft, unn hab waahrlich Ziwwetkatze Kaffi zu mache aagfange. Es waar en gross Glick, SO gut der Kaffi waar. Loss mich eich saage, es gebt ken Ersatz fer en Ziwwetkatz.
Awwer ich hab ken sechs hunnert Daaler fer en Koppche verlange kenne deet, ass ich hett niemand was es waar verzehle kenne. Noh hawwich gedenkt, was annere Esssache besser watt, wann’s darrich en Ziwwetkatz geht?
Well, Yudekasche henn recht gut gschafft, awwer yeder epper henn gedenkt ass mei Yudekaschebois Melassichriwwelbois waar. Abbadich die Micke! Losst uns nix iwwer die Schnitz unn Knepp schwetze. Gewiss net die Seimaage. Abbadich net der Pannhaus!
Der Sauerkraut, nau, sell hot am Bescht gschafft, ass es bissel schtinkich iss ennihau. Die Ziwwetkatze kenne arrig viel Sauerkraut fresse, unn sie gleiche es recht gut, doch bin ich Sauerkraut wie en Narrischer am Eikanne.
So wann dihr darrich Montgomery Kaundi faahre deetet, un en Zeiche fer en Karrich Iems mit Seifleesch un Sauerkraut sehne deetet, kummt dihr rei un browiert es! Awwer wann dihr vorbei faahre deetet, macht eire Maschienefenschdre uffgerollt!
Kevin Sterner
(glese beim Kutzeschtettel Folk Fescht 2015)
The Pennsylvania German Newspaper 