Hallicher Grischtdaag 2016!

christmas-card-ivan-hoyt

 

Eirfich Kinner, Kichlin siess,
En fett Belznickel do un datt,
Farwich Lichter iwwerall,
Gleeni Schtrimp an der Feierherd.
Iss des Grischtdaag?

Leit am kaafe in de Schtadt,
Der Weg un Schtore sinn voll heit,
Alliebber iss sich am dummle.
Sie froge:”Bischt fer Schnee bereit?”
Iss des Grischtdaag?

Brechdiche Kaarde schicke Leit
Zu Freind un Familiye aa,
Gschenk fer gewwe zu sie all,
Wickel’s uff un halt dich draa.
Iss des Grischtdaag?

Grooss Welschhahne uff der Disch,
Leit am esse wie net gscheid,
Kuche, Niss un Minsfleeschboi,
Alles vun de bescht Koscht heit.
Iss des Grischtdaag?

Zuckerschtenglin iwwerall,
Kinnerschpielsach in der Schtor,
Balle, Schlidde, Schockelgeil,
Boppe mit hell grollich Haar.
Iss des Grischtdaag?

Belle in der Karichtann,
Yubellieder, Gmeechlichkeit,
Gschenk verhandle, viel gebsucht,
Neie Gleeder un en guudi Zeit.
Iss des Grischtdaag?

Nee, die Sache all sinn net
Neegscht genunk fer Grischtdaag mache.
Es nemmt meh ass guud Ess-Sach,
Lieder, Gschenk, un Freind un Lache.
Was iss Grischtdaag?

Grischtdaag iss en Gschenk vum Himmel.
Gleener Herr in en niddrich Schtall.
Gottes Verschpreches zu sei Kinner:
Ewich Lewe zu uns all.
Des iss Grischtdaag!

Gladys S. Martin
“Die Effridaa Dichterfraa”

Unser Gedanke sinn des Yaahr abbadich bei
die Kinner un all die Mensche in Aleppo un ganz Syria,
all die Leit, ass ihr Heemet verlosse henn misse
in Middle East, in Africa un aryiets schunscht
un alli Minorities alliwwer, ass alleweil aardlich Druwwel henn.

Mer hoffe, ass all die Kalls und Weibsleit alliwwer
an die Grischtdaag Schtori denke, wann sie ebber aadreffe
vun selli aarme Leit, ass unser Hilf brauche alleweil.

Der Drucker un’s ganz Team vun “Hiwwe wie Driwwe”
winsche alliebber im neie un im alte Land
en hallicher Grischtdaag un en guud nei Yaahr 2017!

(Pickter: Ivan Hoyt, 1991)

Advertisements

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s