Doug Madenford grickt Dialect Award

Doug Madenford mit sei “Preis der Emichsburg Award” in die Mitt, zamme Gunther Bechtel (Mayor vum Stettel Bockenheim, rechts) un Dr. Michael Werner (Glied vun die Bockenheim Jury)

Der Dialect Award “Preis der Emichsburg” hot 2022 der Doug Madenford im Schtettel Bockenheim im alte Land grickt. Die Jury hot gsaat, der Doug hot en latt geduh fer die pennsylvanisch-deitsch Mudderschprooch im neie Land am geh halde mit sei Website padutch101.com, sei Youtube Videos, sei Buch “Schwetz mol deitsch” (zamme mit em Yossi Brown) und sei Musick (zamme mit em Chris LaRose). Newich sell hot er en latt geduh fer die Freindschaft zwischich die Pennsylvanisch-Deitsche im neie Land un de Leit in die “Pfalz” (Palatinate) im alte Land. Sell iss en Gegend im Rhine Valley, wu die meenschte vun die Voreldre vun die Pennsylvanisch-Deitsche abgeschtaert sinn fer ins neie Land ziehge. Die Kultur un die Schprooch sinn datt zimmlich ‘s seem, un die Leit hiwwe wie driwwe kenne ‘nanner guud verschteh. Der Doug Madenford hot im Movie “Hiwwe wie Driwwe – The Roots of the Pennsylvania Dutch” (2019) mitgemacht, un alleweil iss en Drupp vun Leit en zwedder Deel vun “Hiwwe wie Driwwe” am zamme gricke, ass 2024 in die Movie Theaters in Deitschland kumme soll (2025 in Pennsylvania). Aa do iss der Doug Madenford widder debei. Fer sell, hot die Jury in Bockenheim gsaat, iss er nau schunt ebbes wie en “Ambassador” vun die pennsylvanisch-deitsch Kulduur im alte Land. “Hiwwe wie Driwwe” saagt: “Gratulation, Doug! ‘S iss der recht Kall, ass seller Award grickt hot des Yahr.”

Comments are closed.