Nei Bichli: “Ich kann PA Deitsh shreiva”

En nei Bichli hot der Tom Beachy aus Holmes Kaundi in Ohio gepublisht: “Ich kann PA Deitsh shreiva”. Abbadich baut sell Publication iss, ass der Tom en Amisher iss. Gmeenerhand gewwe die Amish net zu viel fer ihr Mudderschprooch. Sie saage yuscht: “S iss yuscht unser Alledaag-Schprooch, ‘s iss net Hochdeitsch un nix Abbadiches.” Yuscht wennich Amische un Mennischte vun die Alt Addning henn browiert lanne Pennsylvanisch-Deitsch schreiwe un lese. Un nau kummt der Tom Beachy un druckt en Bichli mit Title “Ich kann PA Deitsch shreiva” abbadich fer Kinner. Mer muss wisse, ass es zwee Wege gebt fer die Mudderschprooch schpelle: en deitscher Weg un en englischer Weg. Die meenschte Leit in Pennsylvaani gleiche der deitsch Weg (Buffington-Barba System), die meenschte Leit in Ohio un weiter draus im West welle ‘s der englisch Weg hawwe (Committee for Translation Weg). Der Tom kummt vun die Berlin Gegend in Ohio un schpellt fer sell der englische Weg. Mer wisse net, wieviel Kapies ass er gedruckt hot, awwer mer kann sell Bichli kaafe bei Masthof Press in Morganschtettel (PA), wammer uff sell Link klickt.

Advertisement

Pennsylvanisch-Deitscher Kalenner 2012

Deel Leit henn gedenkt, ass es verleicht kenn pennsylvanisch-deitscher Kalenner meh gebt, wann der Gary Kerschner mol doot ist. Er iss gschtarewe in 2010, un sei letschter Kalenner waar fer 2011. Un nau gebt’s gleich zwee neie mit pennsylvanisch-deitsche Daage fer die Munete un aa. Schprichwadde. Eens kammer iwwer’s Internet addere, wammer uff sell Link klickt.

Der anner iss rausgewwe warre beim Pennsylvania German Cultural Heritage Center in Kutzeschtettel, un mer kann sell addere bei Masthof Press in Morganschtettel, wammer uff sell Link klickt.

En nei Bichli: Pennsylvanisch-Deitsche Halloween Scherenschnitte

Ya, mer wisse, ass noch net Schpuknacht iss, awwer yuscht heit hemmer en wunnerbaar guudes Bichli in unser Mailbax gfunne iwwer Pennsylvanisch-Deitsche Halloween Scherenschnitte un deitsche Gedichte. All selli wunnerbaare Scherenschnitte hot unser Freind Peter Fritsch vun Langschwamm (Alburtis, PA) geduh – un er iss aa der Kall, ass all die guude Gedichte gschriwwe hot, ass mer finne kann datt drin. Wie die Gschpucke gucke un die Hexe fliege in sell Buch. ‘S iss en Freed. Un deel Gedichte gehne wie sell:

Aus die Fesser, aus die Krug –
Kumme alle Aard vun Gschpuck.
Sie fliege uff un fliege rum
Un gewwe ewwe gaar nix drum.
Es schallt mit deiwelswiescht Gelach,
Es weewelt, ziddert nuff zum Dach.

Zwee bucklich Mennli fliege bei,
En gaschdich Draam, des kann net sei.
Was henn sie fer en hesslich Ziel?
Uff ihrne hexne Besemschtiel.
Sie ziehe Graft vum Wedderleech,
Die Kepp sinn voll mit Schlechdichkeet.

Do iss en Deiwel, er danzt un lacht,
So halt dich weck devun.
Feierich Haar, en langer Schwanz,
En gfliggelt Hund drum rum.
Er macht, ass wann er hallich waer
An seller schpuckich Nacht;
Er greischt un yohlt un gebt net uff
Mit so umleidlich Yacht.

Sell hot der Peeder gschriwwe, un mer kann sell Bichli addere bei Amazon. Klickt yuscht mol uff der do Gnopp.