Category Archives: Ebbes aus em alte Land

Bekanntmaching: Nei E-Paper Zeiding “DEITSCH”

Deitsch - 2015-1 (NEW)Dihr liewi Leit,

Glaabt’s odder net, awwer mer henn yuscht paar Daag zerick en glee neie Zeiding gschtaert, ass mer yuscht online lese kann im weltweit Gewebb. Der Name vun selli Zeiding iss “DEITSCH”, un sell weist, ass ebbes gschriwwe watt datt iwwer die Leit, die Schprooch un die Kulduur vun die Pennsylvanisch-Deitsche in Pennsylvania un anneri Schteets. Awwer: Die Zeiding iss Hochdeitsch gschriwwe. Mer wisse, ass net zu viel Deitsche in Pennsylvania un aryiets schunscht “Deutsch” lese kenne, awwer mer henn sell gschtaert abbadich fer Leit in Deitschland, Alsace/Lorraine (France) und die Schweiz im alte Land. Mer welle sie ebbes lanne vun was am aageh iss driwwe im neie Land. In des do Issue kammer ebbes Lese vun die Zeit eb Grischtdaag in Pennsylvaani (wann der Belznickel kummt), vun Deitsche, ass gfochte henn in Gettysbarick in 1863, un aa en Grischtdaag-Gedicht, ass der John Birmelin gschriwwe hot in die Mudderschprooch Yaahre zerick.

Abbadich gleiche mer unser Cover-Pickter. Sell waar geduh bei die Rachel Yoder vun Boyerschtettel. Sie hot ihr Art Business gschtaert en Weil zerick un duht alleweil en latt Fraktur Schtofft, Hexezeeche un aa seller wunnderbaar Belznickel, ass ihr datt uff em Cover sehne kennt. Guckt seller Kall bekannt zu eich? Ferschur, ich denk, ich hab ihn schunt etliche Mol in Kutzeschtettel gsehne. Un er hot aa ebbes zu duh mit “Hiwwe wie Driwwe”.

Die Rachel Yoder hot en neier Web Shop, wu sie deel vun ihr Schtofft nei geduh hot. Wann ebber geindresst iss in ausfinne, was sie am duh un was sie am verkaafe iss: Rachel Yoder Art

Viel Gschpass beim Lese!
Der Hiwwe wie Driwwe Drucker

Video

Ebbes aus em alte Land: Es “Palzlied”

Dihr liewi Leit,

allegebott duhne mer ebbes uff sell Website aus em alte Land – sell Weltdeel, ass heit “Pfalz” (Palatinate) genennt watt odder in die Mudderschprooch yuscht “Palz”. So kennt dihr heit es “Palzlied” abhariche, ebbes wie en nei “inofficial anthem” vun die Pfalz. Die Buwe singe “Annerschtwu iss annerscht – un halt net wie in de Palz!” Ich denk, dihr kennt ‘s meenscht vun sell guud verschteh.

Mer winsche alliebber in die Palz un Pennsylvaani, im alte un im neie Land,
en glicklich nei Yaahr 2013.

Der “Hiwwe wie Driwwe” Mann

Ebbes aus em alte Land

Belznickel 2012

 

De Belznickel kummt

Wann’s heit owend dunkel iss,
Kummt de Belzenickel.
Un, des weess ich ganz gewiss:
Eens grieht er beim Wickel!

Sinn schee brav! Ball schteht er drauss,
Duht am Lade rittle.
Un ganz schnell vor unserm Haus
Sich de Schnee abschiddle.

Horch, jetz kummt die Treppe hoch
So en schwerer Dritt!
Ei, ich glaab, er iss es doch!
Bringt er ebbes mit?

Schnell,en Versje noch browiert,
En Gedicht gepischbert.
Voller Angscht un ganz scheniert
Werd bloss noch gewischbert.

Wer gelernt, wie sich’s geheert,
Der kann freilich lache:
Fer den werd de Sack geleert,
Der grieht sieesse Sache!

Bertl Pardall

Grooss Dank, Ingrid Templeton (“die paelzisch Fraa in Pennsylvania”) fer mir sell Gedicht schicke. Ich hab’s yuscht gfunne en Schtunn zerick in mei Mailbax. Mir winsche alliebber im alde un im neie Land en hallicher Grischtdaag – abbadich seller Belzickel uff em Pickter, wu ball “Co-Editor” vun “Hiwwe wie Driwwe” iss.

Michael Werner