Category Archives: Neiigkeete

Henn dihr gwisst …

… ass es in Holmes Kaundi (Ohio) deel Amish gebt, wu anneri Amish nachts der Baart abschneide? Ich hab net, un mer kann sell schier net glaawe. Guckt yuscht mol datt: Der Spiegel

 

 

 

Advertisements

Pennsylvanisch Deitsche Blatznaame? Saag ya!

Im naddlich Lengeschter Kaundi gebt’s meh wie 500 deitsche Naame fer Schtettel, Schtroosse un Bletz wie Gricke odder Hiwwel. Baut 10-15 Street Signs weise alleweil newich der englisch Naame aa der deitsch Naame. Mer wisse net, wann sell geduh iss warre un wer’s geduh hot. Awwer mer denke, ‘s waer verleicht en guudi Idea fer en “Historic Pennsylvania German District” ans geh gricke in die Gegend vun Effridaa. Alliebber kennt noht leicht ausfinne, was die alte deitsche Naame sinn fer die Bletz, wu heidesdaags gmeenerhand yuscht English benaamt sinn. Der Prof. C. Richard Beam hot sitter 1958 all die deitsche Blatznaame gsammelt un gedruckt in sei pennsylanisch-deitsch Waddebuch. Die German-Pennsylvanian Association im alte Land hot en Lischt zammegrickt mit all die Blatznaame. Was fehlt, sinn nau Leit, wu saage: Ya, mer sette en pennsylvanisch-deitsch District ans geh gricke. Un fer sell hemmer en “Cause” ans geh grickt im weltweit Gewebb, wu mer sich neischreiwe kann, wammer denkt, ass sell en guudi Idea iss. Do iss der Link. Geht datt mol anne: Historic Pennsylvania German District. Saag ya!

Heit iss “Pennsylvania Dutch Day 2011”!

Es House of Representaties in Pennsylvaani hot ausgemacht, ass heit der “Pennsylania Dutch Day 2011” iss. Ya well, so wann dihr noch deitsch schwetze kennt, schwetzt mol zu eenichebber schunscht in die Mudderschprooch. Losst all die Englische datt draus im Pennsylania Deitschland wisse, ass dihr noch do seid un die pennsylvanisch-deitsch Schprooch un Kulduur noch am Lewe iss.

Lest “Hiwwe wie Driwwe” mol online …

Sitter heit kammer die nei Ausgab vun “Hiwwe wie Driwwe” (Friehyaahr / Summer 2011) online lese fer yuscht paar Daage. Geht mol zu “E-Paper” un schreibt es recht “Password” nei – ‘s iss desmol “Elbedritsch”. Findt mol aus, was die Kalls un Weibsleit geschriwwe henn in die deitsch Mudderschprooch. Viel Gschpass beim Lese winscht der Drucker, der Michel aus em alte Land.

Pennsylvanisch-Deitsche Lieder ass MP3

Yuscht ewwe hemmer ausgfunne, ass mer pennsylvanisch-deitsche Songs hawwe kann ass en “Download” vun en ebbadichi Seit. ‘S gebt Lieder wie “Wie kumm ich an dei Grossvadders Haus”, “Heili Heilo”, “Lauderbach” un etliche anneri meh. Der Musigant iss der George Britton. Klick yuscht mol uff sell CD Cover, un du bischt neegscht schun datt …

Wu Pennsylvanisch-Deitsche die Mudderschprooch schwetze kenne

En nei Map uff “pfl.wikipedia.org” (die paelzisch Wikipedia) losst alliebber wisse, wu mer die deitsch Mudderschprooch schwetze kann im alte Land. “Area 2” iss, wu mer Paelzisch schwetzt un Deitsche aus em alte un em neie Land nanner es bescht verschtehne kenne …

Meind Harrisbarick – Blooss kenn Nuclear Power!

Sitter 1979 kenne mer wisse, was letz iss mit “nuclear power”. In Harrisbarrick hot’s en groosser Accident gewwe an “Three Mile Island” selli Zeit. Yuscht sex Yaahr schpeeder waar Chernobyl, un alleweil iss alles ‘s unnerscht ‘s ewwerscht in Fukushima. Was muss noch haeppene, bis die Groosskepp alliwwer sehne, ass sell Technology net schafft … nie net!

Weltweit Mudderschprooch Daag 2011

 

 

 

 

 

 

 

Alle Yaahr am 21. Hanning hald die UNESCO ihr weltweit “Mudderschprooch Daag” fer alliebber weise, ass mer die Mudderschprooch eschtimiere un sie schwetze sett – abbadich zu die Kinner. Die German-Pennsylvanian Association hot en Project gschtaert mit Title “En Friehyaahr fer die Mudderschprooch”. ‘S 2011 Program kammer finne uff unser Heemetblatt (links en bissli weider unne).

Erscht Grundsau Lodsch fer Yunge in Pennsbarick

Die Schwenkfelder Bicherei in Pennsburg (PA) halt am Sunndaag um 4 p.m. ihr erscht “Grundsau Lodsch fer Yunge”, un der schnuck Kall grickt aa en Naame an des Zeit. Wann ebber noch annegeh will mit sei Kinnder odder Kinnskinner, sett er die Rebecca Lawrence uffrufe fer ausfinne, eb’s noch en Platz gebt: Rebecca@schwenkfelder.com or (215) 679-3103.