‘S Katz Deitsch Schtick: Yenner 2016

Wann’s kalt iss un duschber iss in Pennsylvaani, gehne die Leit datt alsemol Elbedritschlicher yaage. Ya, sell iss gschpassich – abbadich fer die Leit, wu nix wisse vun seller Gebrauch. Die meenschte Leit wisse net, ass die Musiganter vun die Band CCR etliche Yaahre zerick aa mol in PA gwessst sinn fer so en Elbedritsche Yacht, un wie sell verbei waar, henn sie en pennsylvanisch-deitsche Version gemacht vun ihr Schtick “Bad Moon Rising”. Datt iss es:

Elbedritsche Yacht

“Kumm, geh mit uns heit Owet yaage,
dief in der Busch, mir welle Gschpass.
Loss dir vun uns mol ebbes saage,
du hebscht der Sack, noht fangscht du was.”

GEH NET NAUS HEIT NACHT,
‘S ISS ELBEDRITSCHE YACHT,
DIE BUWE RETZE DICH – GEB ACHT!

“Guckt wie en Voggel mit zwee Hanner,
Schnawwel, Fliggel, Feddre un aa Haar.
En Gans die eeni Seit, en Ent die anner,
En Hinkel zwischich drin, ya, des iss wahr.”

GEH NET NAUS HEIT NACHT,
‘S ISS ELBEDRITSCHE YACHT,
DIE BUWE RETZE DICH – GEB ACHT!

“Guck, mir gehn fatt un welle suche,
des glee Gedier, ass niemand kennt.
Wammer es sehn, not watt es fluche,
dreiwe’s mit Gekrisch, noht kummt’s gerennt!”

GEH NET NAUS HEIT NACHT,
‘S ISS ELBEDRITSCHE YACHT,
DIE BUWE RETZE DICH – GEB ACHT!

“Wann du uns gar nimmie duhscht heere,
sei bloss net bang un waart en Zeit,
denk draa, mer duhn dich ebbes lehre,
wann’s duschber watt, noht iss’s so weit:”

HEB DER SACK HEIT NACHT,
‘S ISS ELBEDRITSCHE YACHT
WASCHT BALL SEHN, ASS BLENDI GSCHPASS SELL MACHT!

HEB DER SACK HEIT NACHT,
‘S ISS ELBEDRITSCHE YACHT
WASCHT BALL SEHN, ASS BLENDI GSCHPASS SELL MACHT!

Deitsch Web-TV: Nei Yaahrs Winsche

Dihr liewi Leit,
Mer verlosse es alt Yaahr 2015 mit en schlechti Neiigkeet: Der Peter Fritsch vun Alburtis iss gschtarewe Disember 16. Er waar 70 Yaahr alt gwesst.
Ich hab der Peeder fer 21 Yaahr gekennt un ihn immer bsucht, wann ich in Pennsylvaani waar. Mit henn als ferschur en guudi Zeit ghatt minanner. Es letscht Mol hemmer nanner gsehne im Hanning 2015. Der Peeder waar en pennsylvaanisch-deitscher Moler, Schreiwer, Schwetzer und Musigant. Mit guudi Freind hot als es “Nei Yaahrs Winsche” geduh fer etliche Yaahre. Sie sinn gezogge vun Haus zu Haus un henn en Seege gewwe fer’s ganz Yaahr. Der Peeder hot mir verzehlt, ass sei Paep sell schun als geduh ghatt hot Yaahre zerick. In selli Zeit henn sie’s nei Yaahr aa noch aagschosse mit die Flinte. Sell hot awwer gegnallt. Un weil die Buwe an alli Bletz ebbes zu drinke grickt henn gehich die Kaelt, henn sie etliche Mol am friehe Maryie neegscht nimmie ihr eegni Heemet gfunne. Sell hot der Peeder als verzehlt. Der Peeder hot die pennsylvanisch-deitsche Birth Certificates gemacht fer mei drei Meedlin, un ich bin aarick froh un dankbar fer sell. Ich hab der Peeder etliche Mol en Eilaading gewwe fer kumme ins alte Land un ausfinne, wu sei Voreldre gwuhnt henn. Er hot awwer als yuscht gsaat: “Nee, Michel, nee. Ich schloof’s ‘s liebscht in mei eegen Bett.” Heit gewwe mer uff hiwwe-wie-driwwe.de der Nei Yaahrs Winsch, ass der Peeder geduh hot en paar Yaahr zerick. Hattyje, Peeder, guuder Freind, un mach’s guud!

Mer winsche alliebber im neie un im alte Land
en guud un friddlich Yaahr 2016

Michael Werner
Der Hiwwe wie Driwwe Mann

Hallicher Grischtdaag 2015

Grischtdaag 2015 Anfang

“Hiwwe wie Driwwe” winscht alliebber im alte un im neie Land
en hallicher Grischtdaag un en guudes nei Yaahr 2016!
Der Comic waar gemacht beim Eugen Keck im alte Land. Grooss Dank fer sell. Zum Schtaerte misst dihr yuscht uff der geele Gnopp dricke.

Es Team vun “Hiwwe wie Driwwe”

Deitsch Web TV: Der bucklich Jack


Im Nadde vun Pennsylvaani in en Gegend neegscht zu Wilkes-Barre hot’s Yahre zerick en latt Kohle Meinde gewwe – awwer heit nimmie. Sell iss die Gschicht vun en Kall aus em Lechaa Daal, wu naach Carbondale (PA) gezogge iss fer in en Meind schaffe fer sei Lewe mache.

‘S Katz Deitsch Schtick: Disember 2015

Der bucklich Tschaeck

Es iss gewiss schun zwanzich Yaahr,
ass ich bin fatt vum heem.
Die Memm hot laut gebrillt, ich hab
sie nie net widder gsehn.

Ich bin gezogge naach Carbondale.
Ich wott, ich waer nie weg.
Hab gschafft mei Lewe in die Meind,
Nau bin ich der bucklich Tschaeck.

Die Arewet iss net leicht geschafft,
in seller duschber Kaelt,
wu yunge Buwe gucke als
wie die eldscht Kalls uff die Welt.

Ferwas bin ich naach Carbondale.
Ich wott, ich waer nie weg.
Hab gschafft mei Lewe in die Meind,
Nau bin ich der bucklich Tschaeck.

Ihr Buwe, draus im Lechaa Daal,
in Baricks un drumrum,
bleibt yuscht uff eier Bauerei
die Meind, die bringt eich um.

Ferwas bin ich naach Carbondale.
Ich wott, ich waer nie weg.
Hab gschafft mei Lewe in die Meind,
Nau bin ich der bucklich Tschaeck.

Milton W. Ivvahzvarich
(Music: Crooked Jack)

Deitsch Web TV: Schpaarsamkeet

Wie sinn die Deitsche in Pennsylvania? Hattschaffich? Alrecht, ya.
Ehrlich. Schur. Guud genunk, awwer was noch?
Mir henn der Doug Madenford gfrogt, wu en yunger Deitscher iss.
Glaab’s odder net: Schpaarsam sinn die Deitsche, hot er gsaat.
Mir winsche eich blendi Gschpass!

Deitsch Web TV: Doug Madenford schwetzt iwwer Harebscht Holidays in PA

Der Doug Madenford und der Chris LaRose duhne allegebott zammekumme un mache Videos iwwer es pennsylvanisch-deitsch Volkslewe.
Heit schwetze sie iwwer pennsylvanisch-deitsche Holidays im Harebscht …

Deitsch Web TV: En Interview iwwer Grundsei, der Belznickel un die Mudderschprooch

Der Michael Werner (HwD Publisher) waar im Hanning 2015 in Pennsylvaani gwesst un hot die “Deitsch Schtunn” uff BCTV Reading bsucht. En Gschpraech mit der Paedrig Donmoyer (HwD Editor Print) iwwer die deitsch Schprooch, es alte un es neie Land, Grundsei, Belznickel un en latt meh.

Deitsch Web-TV: Swinging Pennsylvania Dutch

Unser pennsylvanischer Freind Andrew Smale, wu alleweil im alte Land wuhnt un schafft, hot alte Musickschticker uff Youtube geduh.
Es sagt, “Heffentrager’s Dutch Band”, un ich kann denke, ass sell der Drupp Leit iss, ass der Leroy Heffentrager zamme grickt hot etliche Yahre zerick.
Der Leroy hawwich paarmol aagedrowwe in Baricks Kaundi, wie ich datt gewesst bin. Awwer ich bin net ganz schur, ass es em Leroy sei Band waar.
Ennicher, ‘s iss en guudi Musick, un’s iss alle beed in English un in Pennsylvanisch Deitsch. Blendi Gschpass beim Abhariche!

Fer meh Schticker sehne un abhariche, klick yuscht do …