Pennsylvanisch-Deitsche Musik beim Kutztown Folk Fescht

Michael Werner

Der Drucker vun “Hiwwe wie Driwwe”, Michael Werner, iss des Yaahr widder debei beim Kutzeschtettel Folk Fescht un schpielt Musik datt an Tschulei 2, 3, 4, 5, un 6 – allemol am 11:15 a.m. Er singt alte un neie Schticker in Pennsylvanisch-Deitsch un verzehlt aa en wennich ebbes, was die Pennsylvanisch-Deitsche im neie Land un die Paelzer Leit im alte Land zamme halt iwwer en Zeit vun nau meh wie 300 Yaahr!

Advertisement

Was iss es bescht Gedicht?

Drei Mudderschprooch-Schreiwer Contests hot’s 2021 gewwe in die Pfalz (Palatinate) im alte Land: im Schtettel Bockenheim, im Schtettel Dannstadt un im Schtettel Wallhalben – un’s hot vier Leit gewwe, ass es bescht Gedicht gschriwwe henn ghatt. Ferwas sell? Well, beim Contest in Wallhalben hot’s zwee Gedichte (un zwei Leit) gewwe, ass gwunne henn. Un nau kennt dihr all sell Schreiwes lese un saage, weller Text der allerbescht iss – un fer sell es “Pfälzer Mundartgedicht 2022”. Geht uff die Homepage vun die Zeiding “VielPfalz” un schreibt en E-Mail an die Drucker datt! Macht mit …

Link: https://www.vielpfalz.de/artikel/pfaelzer-mundartgedicht-2022

‘S Katz Deitsch Schtick

Disember

´S Yaahr iss alt. Sei Haar sinn dinn.
Guckt gaar nimmie gesund.
Weess, ass sei Daage rum ball sinn;
Kennt aa sei letschti Schtund.

En latt iss gschehne, deel aa net.
All sell ruht unnich Schnee.
Weiss iss die Welt – der Weg, wie’s sett.
Doch duhn Gedanke weh.

Noch waxt der Muhnd, noch watt er glee.
Nix bleibt. Un nix geht fatt.
‘S iss alles waahr, was mer kann seh.
Un doch aa letz en latt.

Ball kummt der Belzenickel bei,
Deel Kinner waarde bang.
En Grischtbaam holt en Paep ball nei
Ins Haus. Die Zeit watt lang.

Waarscht aa en Kind. Denk mol zerick.
Du meindscht noch, wie sell fiehlt.
Heit glaabscht nimmie an der alt Nick,
Hoscht ihn schun oft geschpielt.

Ball schlagt em Yaahr sei letschti Schtund.
Noht iss es rum – wie’s sett.
Een Daag machscht aa mol zu dei Mund.
Doch wann sell iss, weescht net.

Michael Werner (naach Erich Kästner)