Bsuch

Es hot lang gnumme, awwer endlich hot’s mol widder gschafft, ass der John Schmid vun Berlin (OH) widder mol do waar. Er hot vier Concerts gschpielt in Oktower 2023. Eens vun selli waar der 17. German-Pennsylvanian Day in Eberbach (Neckar). Datt hemmer zamme aa der Mayor vun Kutztown aagedroffe, Jim Schlegel. Er waar datt mit sei Buwe Andy Schlegel un Dan Schlegel.

Im Summer 2022 bin ich beim Kutzeschtettel Folk Fescht gwesst. Sell waar ferschur en aardlich guudi Zeit. Ich hab Musik gschpielt uff die “Main Stage” alleenich un zamme mit Freinde un hab en latt Leit aagedroffe un bsucht, ass ich kenn. Yuscht paar Daag dernoh hawwich der Doug Madenford widder aagedroffe im alte Land. Mer – die Leit vun die “New Paltz Band” – henn zamme Musik gschpielt ihm uff die “Madenburg” (Palatinate). Naach sell hot er Musik gemacht zamme mit Monji El Beji un sei Freind vun die Band “Woifeschdkänich”. Sell all waar fer die nei Documentary “Hiwwe wie Driwwe 2”, ass 2024 in die Movie Theaters kumme soll – hiwwe wie driwwe.

Im Summer 2021 waar ich beim Erich Mace, en Baricks Kaundi Deitscher, un sei Familie. Sie wuhne alleweil – glaabts odder net – in Frankenthal (Pfalz) im alte Land. Mer henn en guudi Zeit ghatt minanner.

Der Ben Rader, sei Fraa Sonja un die Buwe Wolfgang un Hendrik waare bei uns im Oktower 2019. Der Ben waar unser Kinschtler fer die “Hiwwe wie Driwwe Palatinate Tour 2019”. Der Raders sinn kummer aus Reeders (PA). Awwer die Voreldre vum Ben sinn aus Mutterstadt (Palatinate).

Im Tschulei 2019 waare mer mol widder uff em Kutzeschtettel Folk Fescht un henn datt Musick gschpielt, un wie mer graad zerick waare im alte Land, hot uns der Curtis Dietrich aus Fogelsville (PA) mit sei Familie bsucht. Sell waar blessierlich.

Der Doug Madenford vun Howard (PA) waar im alte Land im Abril 2019 fer der Schtaert vun unser Documentary “Hiwwe wie Driwwe – Pfälzisch in Amerika”. Oh, was hemmer en guudi Zeit ghatt.

Im November 2018 hot uns der Michael Landgraf bsucht. Er wuhnt in Neustadt an der Weinstraße, wu sie en latt wisse vun die Elbedritschlicher. Mir henn gschwetzt iwwer des un sell, die Paelzer un die Pennsylvanisch-Deitsche. Der Michael iss en Glied vun die Jury vum “Mundartdichter-Wettstreit Dannstadter Höhe”.

Der Patrick Donmoyer, Site Manager vum Pennsylvania German Cultural Heritage Center, hot uns bsucht im Oktower 2018. Mir henn zamme vier Presentations geeduh iwwer die pennsylvanisch-deitsch Kulduur: in Alzey, Oberalben, Bockenheim un beim 13. German-Pennsylvanian Day in Ober-Olm. Mer henn en guudi Zeit ghatt. Sell iss ferschur.

Im Augscht 2018 waar die Ashley Snyder vun Robesonia (PA) bei uns gwesst fer paar Daag. Sie iss en Hochschul-Schulmeeschtern un waar fer’s erscht mol in die Pfalz. Am 7. Augscht waar die Premiere vun die Documentary “Hiwwe wie Driwwe – Pfälzisch in Amerika” im State Parliament (Landtag) in Mainz. Datt hemmer aa die Prof. Mary Laub un ihr Mann Bill Laub aagedroffe. Die zwee schwetze aa noch die Mudderschprooch.

Im Disember 2017 henn uns der Christian Schega un der Benjamin Wagener bsucht. Die zwee yunge Kalls aus em alte Land sinn alleweil en TV Documentary am zammegricke un yuuse der Title vun unser Zeiding: “Hiwwe wie Driwwe – Pfälzisch in Amerika”. Mer henn es letscht Interview gewwe, un nau sinn sie alles am faddich mache. Die Documentary soll 2018 in unnerschiddliche Cinemas in Deitschland un Pennsylvania abgewisse warre zu Leit, ass en Interest henn in die pennsylvanisch-deitsch un paelzisch Schprooch un Kuldur.

Der Mike & die Linda Hertzog vun Blandon (PA) waare bei uns im alte Land im Oktower 2017 fer die “Hiwwe wie Driwwe Palatinate Tour 2017”. Sie henn Music gschpielt in Ober-Olm, Oberalben, in Bockenheim un beim 12. German-Pennsylvanian Day in Billigheim-Ingenheim. Der Drucker hot mit Music gemacht, un mir henn ferschur en guud Zeit ghatt minanner.

Im Augscht 2017 waare der Doug Madenford un sei Fraa Jessica bei uns in Ober-Olm. Zamme mit paar anneri Kalls sinn mir alleweil en Documentary am duh mit Title “Hiwwe wie Driwwe – Pfälzisch in Amerika”. Die Haabtleit bei des do Project sinn der Christian Schega un der Benjamin Wagener. Mir henn en wunnerbaar guudi Zeit ghatt un aa Musick minanner gschpielt.

Im Summer 2017 hawwich’s Kutztown Folk Festival bsucht un en latt Freinde aagedroffe. Sell war feschur widder es groosser Gschpass. Abbadich bedanke will ich mich bei die Leit, ass uns en Heemet gewwe henn en Weil: Dale Schwoyer (Berks County), Ben & Sonja Rader (Monroe County), Ben & Anna Riehl (Lancaster County) un Bill & Alice Spayd (Lebenon County).

Katz eb Grischtdaag 2016 waare der Ron Hackett un sei Fraa Reta vun Ontario (Canada) bei uns zu Bsuch. Mer henn en guudi Zeit ghatt un henn der “Weihnachtsmarkt Mainz” bsucht minanner. (Yuscht en Woch schpeeder hot sei Fraa mir en ePoscht gschriwwe und gsaat, ass er gschtarewe iss, katz naachdem sie widder deheem waare in Ontario. Er waar 80 Yaahr alt.)

Der Chris LaRose waar uff Bsuch beim Drucker in Ober-Olm im Oktower 2016. Er iss en Musigant, un mer henn ferschur en guudi Zeit ghatt minanner. Der Chris hot sei Program “Pennsylvania Dutch Songs Never Sung” gschpielt an vier Bletz im alte Land, un fer sell hemmer noch vier neie Schticker gemacht. ‘S waar blessierlich.

Im Abril 2016 henn der Gary Waltner un die Dr. Astrid von Schlachta vun die “Mennonitische Forschungsstelle” (Weierhof, Palatinate) unser Archive bsucht in Ober-Olm. Grooss Dank fer neischtobbe.

Im Aagscht 2015 iss der HwD Drucker 50 Yaahr alt warre un hot en Versammling ghatt mit baut 80 Leit im Emigration Museum Oberalben im alte Land. Die Schwetzer waare der Roland Paul, Director vum “Institute for Palatine History and Folklife Studies”, der Dr. Walter Sauer (Verlag Edition Tintenfass), der Helmut Seebach (Bachstelz Verlag) un der Wilhelm Hauth (Elwedritsche Association Landau). Sie henn all gschwetzt iwwer die Paelzer Auswannering, die pennsylvanisch-deitsch Schprooch un die deitsche Wege im neie Land und iwwer die schweizer Watzle vun die Pennsylvanisch-Deitsche un Paelzer. Die Musick hot der Michael Geib (Westrich Museum Ramstein) gemacht mit die Atamaniuk Brieder. Die Kalls kumme vun Lorraine, France, un heesse sich “Schaukelperd”. Mer henn all minanner en wunnerbaar guudi Zeit ghatt. Grooss Dank!

Fer der 10. German-Pennsylvanian Day in Bockenheim im alte Land waare der Prof. Dr. Mark Louden un der John Schmid kumme in Pfalz. Die Leit henn gegliche, was sie verzehlt un gsunge henn.

Im Hanning 2015 hawwich Pennsylvaani widder mol bsucht fer zwee Woche. Ich hab en wunnerbaar guudi Zeit ghatt, awwer es waar aardlich kalt. Die Grundsau hot ihrn Schadde gsehne, un dihr wisst, was sell meent.

Im Oktower 2014 waar der Bill Meck vun Alburtis (PA) im alte Land fer schwetze bei vier unnerschiddliche Events un abbadich beim 9th German-Pennsylvanian Day (9. Deutsch-Pennsylvanischer Tag). Er hot ferschur aa “Hiwwe wie Driwwe” bsucht in Ober-Olm.

Die Dale Schwoyer vun “Breisseschteddel” (Pricetown, PA) waar bei uns deheem fer e Owet im Abril 2014. Mir kenne nanner schun 20 Yaahr, un’s waar aarick blessierlich fer widder en wennich Zeit schpende mit ihr un schwetze iwwer Schtofft, ass am aageh iss im alte un im neie Land.

Der Parre Richard Miller vun Topton (PA) waar der Keynote Speaker beim 8th German-Pennsylvanian Day im Oktober 2013 in Ladenburg. Er hot gschwetzt un gsunge datt, awwer aa noch in Ober-Olm, Oberalben un Bockenheim. Sell waar gewiss blessierlich, un meh wie 500 Leit henn ihn abgharicht.

Im September 2013 waar der Helmut Seebach vun Mainz in unser Archive. Mer henn gschwetzt iwwer die Schweizer, ass in die Pfalz kumme sinn im 17. Yaahrhunnert un henn die Froog iwwerschwetzt: Wieviel Schweiz schteckt noch in die Leit in die Pfalz im alte Land, un wieviel aa bei die Pennsylvanisch-Deitsche.

Im Auguscht 2013 henn uns die Brittany Hammons (Pappas) vun Chicago un ihr Mann, Christopher Hammons, bsucht. Die Brit waar uffgebrocht gwesst im Shenandoah Valley, Virginia. Wie sie noch en Kind waar, hot sie im Chor “Schwadore Schalle” gsunge zamme mit ihre Schweschdre, Brieder un ihr Gremmem, die Alice Spayd vun Schtumbe, Lebnen Kaundi. Aa noch im Auguscht hemmer gsehne der John Schmid (Berlin, OH) mit sei Freind Wolfgang Wirth.

Der Andrew Smale un sei Bruder Dan vun Kresgesville waare bei uns im Tschulei 2013, zamme mit en Freind, ass Deitschlenner waar. Sell waar gewiss en groosi Freed. Der Andrew hot wunnerbaar guud hochdeitsch schwetze kenne un will nau noch meh Pennsylvaanisch-Deitsch lanne – die Schprooch vun sei Eldre un Groosseldre.

Bsucht hot uns im Tschuun 2013 fer en Daag der Ira Wagler vun Nei Holland (Lengeschter Kaundi). Der Ira hot en Buch gschriwwe mit Title “Growing up Amish”. Meh wie 140,000 Copies sinn verkaaft warre sitter 2011, so ass es Bichli uff die Bestseller List vun die Nei Yarick Times gwesst ist. Iss sell net ebbes? Mir henn en guudi Zeit ghatt minanner.

Im Oktower 2012 hemmer der Keith Brintzenhoff vun Kutzeschtettel (PA) bei uns ghatt fer der “7th German-Pennsylvanian Day” in Landau im alte Land un der “Palatine Dialect Writers Contest” in Bockenheim. Musick gemacht hot er aa im “Palatine Emigration Museum” in Oberalben.

Die Julia Mace vun Kutztown waar bei uns fer zwee Woche im Tschuun 2012, uff Bsuch bei eens vun unser Meedlin. Noht hot ihr Paep, der Prof. Derek Mace, sie widder uffgepickt un heem gnumme.

Im Moi 2012 waar ich widder in Pennsylvaani gwesst fer zwee Woche.

Im Oktower 2011 henn uns der Don un die Norma Breininger vun Nei Tripoli (PA) bsucht fer paar Daag. Der Donnie hot gschwetzt beim Mudderschproochschreiwer-Contest in Bockenheim un beim Deutsch-Pennsylvanischen Tag 2011 im Schtettel Weierhof (Palatinate).

Der Prof. Derek Mace vun Kutzeschtettel hot uns bsucht im Tschuun 2011. Mer henn en guudi Zeit ghatt.

Im Oktower 2010 hot uns der John Schmid bsucht mit sei Fraa Lydia un eens vun sei Meedlin, die Katie. Er hot unnerschiddliche Concerts gewwe im Auwanderermuseum Oberalben”, beim Mudderschproochschreiwer-Contest in Bockenheim un beim 5. Deutsch-Pennsyvlanische Tag in Eschelbronn. Mir henn blendi Gschpass ghatt minanner.

Viel Bsuch hemmer ghatt in Ober-Olm im September 2010. Der Dave Swartzentruber un sei Fraa Irene vun Berlin (OH) sinn zamme mit en ganzer Drupp Leit naach Deitschland kumme un henn neigschtoppt. Debei waare: Paul un Ruth Hershberger (Kalona, IA), Floyd un Sarah Yoder (Arthur, IL), Cal un Shirl Bontrager (MI) un der Dale un die Back McIntyre (WI). Der “Irish Dutchman” un sei Fraa waare awwer leenich unnerwegs im alte Land.

Im neie Land waar ich im Tschuun/Tschulei 2010 widder fer zwee Woche – zamme mit mei Buddie, der Frank Kessler. Mer waare in PA, OH, MD un VA un henn en latt deitsche Leit aagedroffe fer schwetze mit.

Im Moi 2010 hot uns der Ron Hackett besucht aus Wallenstein (Ontario).

Naach em viert Deitsch-Pennsylvaanisch Daag in Alzey im Oktower 2009 waare der Prof. Don Yoder, der Prof. Rob Reynolds un sei Fraa Jeanette un der Dr. Helmut Schmahl mit sei Fraa Elizabeth in Ober-Olm. Ass en Iems hot’s Zwiwwelkuche gewwe.

Der Peter Knapp un sei Fraa vun Leola (PA) henn Klein-Winternheim bsucht neegscht zu Ober-Olm. Sell waar im September 2009.  Sei Voreldre henn sell glee Schtettel verlosse baut 250 Yaahr zerick. Mit debei uff Bsuch waar aa der Hans Buch vun Enkenbach-Alsenborn.

Im Tschuun 2009 waare der Prof. Rob Reynolds (Kutzeschtettel), der Prof. John Delaney (Kutzeschtettel), der Ed Quinter (Ellsdaun) und der Frank Kessler (Brussels) uff Bsuch. Sell waar ganz wunnerbaar.

Im September 2008 waare die Brittany Pappas un der Ed Quinter (Ellsdaun) bei uns zu Bsuch.  Sie waare do fer der 3. Deitsch-Pennsylvanisch Daag an September 20 uff’m Weierhof (Pfalz). Datt hemmer aa die Bernice Hicks aagedroffe vun Germanschteddel.

Im Auguscht 2008 hemmer en neier pennsylvanisch-deitscher Sticker drucke losse. Uff sell schteht gschriwwe: “Mer schwetze noch die Mudderschprooch”. Sell Sticker kammer anne bappe uff die Hausdeer, uff die Maschien un aryets schunscht.

Im Tschulei 2008 hot die Jennifer Trout uns bsuche welle in unser Heemet, awwer sell hot net gschafft. Die Jenn helft der Prof. C. Richard Beam vum “Center for Pennsyvlania German Studies” in die Millerschtadt bei sei Arewet. Sie waar schunt im alte Land, awwer noht hot ihr Bahs gsaat, er deet sie deheem brauche – un so hot sie heemgeh misse mit’m Luftschiff, eb mir uns sehne henn kenne. Sell waar ferschur schaad.

Im Tschuun 2008 waare bei uns in Ober-Olm die Amanda Ackroyd (Canada), un der Gary Blosser vun Illinois mit paar annre Kalls. Awwer der Gary hemmer verfehlt. Sell waar schaad.

Im Matz 2008 hemmer Bsuch grickt vun die Alice Spayd un der Bill Spayd.

Im Disember 2007 hot die Amanda Ackroyd ‘s alte Land verlosse un iss widder zerick naach Kanadaa. Nau wuhnt die Brittany Pappas fer paar Munet bei die Werner Familie. Sie iss am schaffe ass en Assistant Teacher in en Schul im Schtettel Mainz. Sie schwetzt wennich Pennsylvanisch-Deitsch. Sell hot sie glannt vun ihre Gremmem un vum Gross-Grossdaadi.

Im Oktower 2007 waar der Drucker vun “Hiwwe wie Driwwe” im neie Land fer zwee Woche. Er hot gschwetzt an “Franklin & Marshall College” in Lengeschter iwwer die pennsylvaanisch-deitsch Schprooch un Kuldur.

Im September 2007 waar der Parre Richard Miller (Brooklyn, NY)mit sei Fraa Carolyn Miller un sei Freind, Parre Bill Paulsen, bei uns zu Bsuch. Die Parre hen noch guud deitsch gschwetzt. Paar Daag naach sell hot im Schtettel Essenheim neegscht zu Mainz der zwett “Deutsch-Pennsylvanische Tag” Blatz genumme. Sell is en Versammling vun die Gsellschaft “Deutsch-Pennsylvanischer Arbeitskreis e.V.” Mit debei waare aa etliche Glieder vun die Hassinger Familie in Deitschland un der Steven Hassinger vun Lebanon (PA) mit sei Fraa, sei Bruder un sei Eldre. Gschwetzt hot bei die Versammling der Prof. Mark L. Louden vun Madison (WI).

Im Tschulei 2007 hot bei uns die Brittany Pappas neigschtoppt. Sie is es Groosskind vun die Alice B. Spayd vun Fredericksburg (PA). Sell waar blessierlich. Un die Emily Lavender von Vancouver Island (Kanadaa) hot die Amanda bsucht.

Im Abril 2007 waar “Hiwwe wie Driwwe” uff Bsuch un Paris (France). Un, glaab’s odder net, en Pennsylvaanisch-Deitscher wuhnt datt schun sitter 1984. ‘S is der Virgil Shrock aus Illinois. Mir hen en guudi Zeit ghat minanner un aa en latt gschwetzt in die Mudderschprooch. Schpeeder waar der Tyler Phillips vun Kanadaa bei uns deheem fer en Weil.

Sitter Yenner 2007 wuhnt Amanda Ackroyd bei die Werner Familie in Ober-Olm. Sie kummt vun Canada un is 18 Yaahr alt. In Deitschland is sie as en Aupair, awwer sie helft aa en wennich bei die Arewet in unser Archive un mit “Hiwwe wie Driwwe”. Mer sin froh fer sie do hawwe. Sie lannt deitsch – un die zwee Meed vum Drucker lanne English – un der Drucker selwert aa ;-).