Category Archives: ‘S Katz Deitsch Schtick

Der Belznickel, der kummt heit zu dir

Du gebscht besser Acht
Un kreischt net erum,
Duhscht dich behave,
Ich sag dir warum:
Der Belznickel, der kummt heit zu dir.

Er hot schun sei List
Zwee mol gecheckt,
Un er find aus, wer lieb is, wer net.
Der Belznickel, der kummt heit zu dir.

Er sehnt uns, wammer schloofe,
Weess immer, was mir duhn,
Er weess, eb du waarscht rielli guud,
So geb Acht, ich heer ihn schun.

Du gebscht besser Acht
Un kreischt net erum,
Duhscht dich behave,
Ich sag dir warum:
Der Belznickel, der kummt heit zu dir.

Er kummt naach Lechaa Kaundi,
Schuylkill un Baricks aa.
Er guckt fer dich in Lengeschter,
So sei guud, denk allfatt draa.

Du gebscht besser Acht
Un kreischt net erum,
Duhscht dich behave,
Ich sag dir warum:
Der Belznickel, der kummt heit zu dir.

Mer winsche alliebber hiwwe wie driwwe, im alte wie im neie Land, en hallicher Grischtdaag un alles Bescht fer’s nei Yaahr 2023.

Michael Werner

Advertisement

‘S Katz Deitsch Schtick

Disember

´S Yaahr iss alt. Sei Haar sinn dinn.
Guckt gaar nimmie gesund.
Weess, ass sei Daage rum ball sinn;
Kennt aa sei letschti Schtund.

En latt iss gschehne, deel aa net.
All sell ruht unnich Schnee.
Weiss iss die Welt – der Weg, wie’s sett.
Doch duhn Gedanke weh.

Noch waxt der Muhnd, noch watt er glee.
Nix bleibt. Un nix geht fatt.
‘S iss alles waahr, was mer kann seh.
Un doch aa letz en latt.

Ball kummt der Belzenickel bei,
Deel Kinner waarde bang.
En Grischtbaam holt en Paep ball nei
Ins Haus. Die Zeit watt lang.

Waarscht aa en Kind. Denk mol zerick.
Du meindscht noch, wie sell fiehlt.
Heit glaabscht nimmie an der alt Nick,
Hoscht ihn schun oft geschpielt.

Ball schlagt em Yaahr sei letschti Schtund.
Noht iss es rum – wie’s sett.
Een Daag machscht aa mol zu dei Mund.
Doch wann sell iss, weescht net.

Michael Werner (naach Erich Kästner)





Hiwwe wie Driwwe Buch iss faddich

Yuscht en katzi Weil zerick iss es Bichli “Hiwwe wie Driwwe – Der Pennsylvania ReiseVERführer” gedruckt warre un gschickt zu meh wie 400 Unnerschtitzer vun unser Crowdfunding Campaign. Nau kammer es Buch aa kaafe in all die local Schtors im alte Land un ferschur aa online. Alles datt drin iss gschriwwe in hochdeitsch. Uff em Pickter weise der Michael Werner (author) un der Steffen Boiselle (publisher) ab, wie es Bichli guckt …