Category Archives: ‘S Katz Deitsch Schtick

‘S Katz Deitsch Schtick: Mei Riggelweg

Mei Riggelweg

Wann ich mol ganz umleidlich bin
Un niemand meh will seh,
Noht graeddle ich die Schteg enuff,
duhn uff mei Schpeicher geh.

Datt schteht mei alter Riggelweg,
Grooss ess er, gmacht vun Tin.
´S gebt blendi Heiser, Leit un Beem,
En Station middes drin.

Was bin ich alsemol verzannt,
Un grick en rooder Kopp,
Denk ich an sell grooss dabbich Wand. –
Noht drick ich uff der Knopp.

Un schun schtaert glei mei Riggelweg,
Weess nix vun aarme Leit,
Ass welle besser lewe yuscht,
Fer alles sinn bereit.

Mei Riggelweg weess nix devun,
Ass mer nau Kinner trennt
Vun ihr Familie, denk yuscht mol.
Ich weess, was mer sell nennt …

Doch saag ich nix, inschtatts vun sell,
Watch ich mei Riggelweg,
In Circles geht er schnell wie nie,
Ganz naach seim Leweszweck.

In seim Land gebt’s kenn Weisshaus net,
Kenn Karich un kenn Gmee,
Kenn Bressens un kenn groossi Wand,
Un alles, was ich seh …

Sinn kummne Leit, sie gucke ´s seem,
Vun owwe – glee wie nie,
Wasewwer aa ihr Ziel sei mag:
Sie gehn in Circles hie.

Un darich die Zeit verliert sich doch,
was dumm iss un was gscheit,
Was nau noch recht iss, iss ball letz,
´S kimmert mich nix heit.

Un ewich geht der Riggelweg,
Weess nix vun guud un bees,
Un ass sei Weg unendlich iss,
Iss alles, ass er weess.

Milton Ivvahzvarich (2018)

Advertisements

‘S Katz Deitsch Schtick: Lebnen Pennsylvanisch Deitsch Zammelaaf


Guder Daag Blog Leser! Well, ‘s iss widder Matz, un in Lebanon Kaunty sell mehnt, ass es widder Zeit fer der Zammelaaf iss. Des Yaahr alles watt uff die Lebanon High Schul sei. Der Zammelaaf iss en arrig gude Gelegeheit viel iwwer unsre Schprooch, Kuldur, Kunscht, Gschicht un Esse zu lanne un zu erlewe. Es gebt viel Verkaafer, Entertainment, Schwetzer, un Myusick. Ass mer uff die Flyer owwe sehne kann, gebt es viel zu sehne un heere. Un, net zu bralle, awwer es gebt en arrig gude Show um Vaddel eb drei Uhr. Ich hab gheert ass die zwee Kalls arrig luschdig sinn. Wann du glee bissel Zeit naegschde Samschdaag hoscht, un du wuhnscht net zu weit weg, kumm mol naach Lebanon un bsuch des Event! Wann du mich sehnscht, saag “Guder Daag” un dann kenne mir schwetze!

Doug Madenford
Co-Editor “Hiwwe wie Driwwe”
https://padutch101.com

‘S Katz Deitsch Schtick: Parkland Highschool

Ganz schtill

Ganz schtill leischt du do, kannscht mich net heere.
Dei Aage sinn weit uff wie nie.
Gaeb’s yuscht en Weg, dei Ruh zu schteere,
Ich deet dich nemme ariyets hie.

Wie waar der Mariye so guud un schee,
Du waarscht deheem, bischt gange noht –
Un in die Schul. Un was ich seh
Iss nix wie Blut – un du bischt doot.

Do waar en Kall, do waar en Bix.
En Sack voll Bullets un schunscht nix.
Du hoscht gehockt am letze Blatz.
Der Schuss waar schnell – Dei Lewe katz.

Ganz schtill leischt du do, kannscht mich net heere.
Dei Aage sinn weit uff, mei Kind.
Waere mir schmaert, deet uns sell lehre
Es Lewe meh zu gleiche wie en Flint.

(In memoriam)

‘S Katz Deitsch Schtick:

Guder Daag Blog Leser! ‘S iss schpot Yenner … Hanning kummt. Dihr wisst, was sell meent: Grundsau Daag kummt gschwindt. Fer uns Deitsche iss Grundsau Daag wie en heilige Daag. Verschiddliche Grundsei kumme aus ihre Lecher un brophezeie iwwer es Wedder fer de naegschde sex Woche. Bleibt Winder lenger, odder kummt es Friehyaah frieh? Die Grundsau saagt uns. […]

über Grundsau Lodge Zeit! — Nau loss mich yuscht eppes saage!

‘S katz deitsch Schtick: Disember

 

Disember

´S Yaahr iss alt. Sei Haar sinn dinn.
Guckt gaar nimmie gesund.
Weess, ass sei Daage rum ball sinn,
Kennt aa sei letschti Schtund.

En latt iss gschehne, deel aa net.
All sell ruht unnich Schnee.
Weiss iss die Welt – der Weg, wie’s sett.
Doch duhn Gedanke weh.

Noch waxt der Muhnd, noch watt er glee.
Nix bleibt. Un nix geht fatt.
´S iss alles waahr, was mer kann seh,
Un doch aa letz en latt.

Ball kummt der Belzenickel bei,
Deel Kinner waarde bang.
En Grischtbaam holt en Paep ball nei
Ins Haus. Die Zeit watt lang.

Waarscht aa en Kind. Denk mol zerick.
Du meindscht noch, wie sell fiehlt.
Heit glaabscht nimmie an der alt Nick,
Hoscht ihn schun oft geschpielt.

Ball schlagt em Yaahr sei letschti Schtund.
Noht iss es rum – wie’s sett.
Een Daag machscht aa mol zu dei Mund.
Doch wann sell iss, weescht net …

Michael Werner
(naach Erich Kästner)

Mer winsche alliebber im alte un im neie Land
en gsund un glicklich nei Yaahr 2018.

‘S Katz Deitsch Schtick: Nei Bichli “1000 Wadde Pennslyvanisch-Deitsch”

Wie lannt mer Pennsylvanisch-Deitsch? Mer lannt erscht deel Wadde, noht lannt mer wennich Grammar – sell iss verleicht en Schtaert. Do henn mir es bescht Gschenk fer Grischtdaag 2018. Henn dihr Eldre odder verleicht noch en Gremmem odder Graempap: Gebt ihne sell nei Bichli “1000 Wadde Pennsylvanisch Deitsch” ass en Grischtdaag Gift. Mol sehne, wieviel Wadde sie noch meinde. Henn dihr Kinner? Sell iss noch besser. Gebt ihne sell nei Bichli, un sie lanne verleicht die erschte deitsche Wadde – so ass die Mudderschprooch net zu nix geht. Es Bichli sett gedruckt sei im neegscht Friehyaahr, so ass es faddich iss eb der Grischtdaag 2018.

Klick mol do, un dihr grickt en Subscription Form.

HwD Web TV: Versammling in Baricks Kaundi

Der Keith Brintzenhoff hot gschwetzt un gsunge in Leesport, un 450 Deitsche henn en guudivZeit ghatt. Grooss Dank zum Doug Madenford fer sell Video druu duh uff Youtube.

Im Trump sei Heemet schwetze sie die Mudderschprooch

Okay, mir all wisse, ass der Donald Trump nau der greescht Groosskopp iss im neie Land. Was deel Leit awwer net wisse, ass sei Grempaep gebore waar un gewuhnt hot in die Heemet, vun wu die meenschte Voreldre vun die Pennsylvanisch-Deitsche kumme sinn: die “Pfalz” (the Palatinate). In des do Documentary kennt dihr ebbes lanne vum Schtettel Kallstadt, wu sei Grempaep gebore waar, vun die Familie Trump un Heinz (Ketchup), vun Seimaage – mer heert die Paelzer schwetze in die deutsch Mudderschprooch un en Cousin vom Donald schwetze iwwer die Gschicht vun die Trump Familie. All die Leit schwetze Dialect, so henn sie Subtitles druff duh misse fer die Leit im German TV, ass net aus des Weltdeel sinn. ‘S iss gschpassich un guud zu verschteh, wammer Pennsylvanisch-Deitsch schwetzt.

‘S Katz Deitsch Schtick: Johnny Cash’s Folsom Prison Blues

Reddin Bressen Blues (Reading Prison Blues)

Was kann ich datt drauss heere,
Iss sell der Riggelweg?
Die Sunn iss hell am scheine,
Doch was iss der Zweck?
Ich hock im Reddin Bressen,
Un mei Zeit schteht schtill.
Doch der Riggelweg geht anne,
wu ich hiegeh will.

Wann ich waar en Bobbli,
Mei Memm hot zu mir gsaat:
“Sei yuscht immer guud, Bu,
halt dich vun Flinte fatt!”
Doch hawwich ebber gschosse
Yuscht fer ihn doot geh seh.
Der Riggelweg duht peife,
wie gaern deet ich mit geh!

Ich denk, ‘s gebt reiche Leit datt,
Ihr Owetiems henn sie.
Sie schmoke, drinke Coffee
Un ich grick Cigars nie.
Ich weess, ass ich bin schuldich,
Ich weess, ich kumm net frei.
Die Groosskepp sinn am fahre,
Doch ich war gaern debei.

Oh, deet doch ebber kumme,
Mich hole aus sell Loch,
Noht deet ich weschtlich ziehge,
Wann sie mich suche noch.
Weit fatt vum Reddin Bressen,
Deet ich bleiwe dann,
Wu em Riggelweg sei Peife
mei Blues fatt dreiwe kann.

Translated by Michael Werner