Deitsch Web TV: Der Belsnickel un Santa Claus

Was iss der Unnerschitt zwischich em Belsnickel un em Santa Claus? Der Doug Madenford saagt: Der Santa gebt die Kinner Sweets eenicherweg, wie sie behaeft henn – un der Belsnickel gebt die Kinner Schleeg eenicherweg, wie sie beheeft henn. Sell glaabt dihr net? Dann watcht mol sell Program vun “Ask a PA Dutchman” ab …

Deitsch Schtunn uff BCTV: Disember 2016 Show

Die “Deitsch Schtunn” waar widder uff die Luft geschter uff Baricks Kaundi TV in Reading. Guckt mol und haricht mol, wie der Dolpehocken Saenger Choris wunnerbaar gsunge hot. Un ya, die Miller Brieder waare aa zu sehne mit paar vun ihre deitsche Schticker. Viel Gschpass!

‘S Katz Deitsch Schtick: Em Donald Trump sei Voreldre sinn aus em alte Land

Elisabeth und Friedrich Trump, die Grosseldre vum Donald Trump. Sie sinn naach America gezogge im Yaahr 1902.

Elisabeth und Friedrich Trump, die Grosseldre vum Donald Trump. Sie sinn naach America gezogge im Yaahr 1902.

KALLSTADT (Palatinate). Der Donald Trump watt der neegscht US President im Yenner 2017. In die Pfalz (Palatinate) im alte Land sinn sie en latt am schwetze iwwer ihn, weil sei Voreldre vun datt aus en glee Schtettel kumme sinn: Kallstadt. Baut 1,000 Leit wuhne datt. Sie schwetze Paelzisch. Fer sell kammer sie guud verschteh, wammer Pennsylvanisch-Deitsch schwetzt. Sie gleiche Seimaage un kumme ebmols zamme im Yaahr, fer en guudi Zeit hawwe minanner—mit Wei (ass die Romans gebrocht henn 2,000 Yaahr zerick) un Bier (ass die Bavarians gebrocht henn baut 200 Yaahr zerick).
„Mei Paep iss en Second Cousin vum Donald Trump“, saagt der Bernd W. un lacht. Er iss 54 Yaahr alt un schteht drauss uff die Schtrooss yuscht vannich sei Heisli, ass en Wattshaus iss. Es iss kalt, awwer der Kall hot sei katz Hemm aa. Er hot helle Haar, schtaricke Hend. En „Schaffer“, deet mer in die Pfalz saage, un en „Wine Dresser“ fer sei Lewe mache. Er saagt: „Mir sinn Freindschaft, sell iss all, ass ich weess. Schur iss es ebbes Abbadiches, wann die Watzle vun so en reicher Groosskopp im Schtettel sinn, wu mer wuhnt.“ Ob er gleiche deet, der Trump mol aadzudreffe un zu blaudere? „Wann er mol kaemt, ferwas net?“, saagt er. Awwer wammer ihn frogt, was er am denke iss, iwwer was der Donald Trump so alles gsaat hot in sei Campaign, noht antwatt er:“ Ya well … nee, frog besser net.“
Die ganz Schtori schtaert im Yaahr 1885. In seller Zeit hot der Grempaep Friedrich Trump Kallstadt verlosse un iss naach America gezogge. Er waar yuscht 16 Yaahr alt gwesst selli Zeit. Er hot in Nei Yarick gschafft ass en Hair Dresser, hot schpeeder en Hotel ghatt an die West Coast un hot am End en Wattshaus ghatt am Yukon, wu die Leit naach Gold gegrawe henn. All sei Geld hot er gschpendt in Land in Manhatten. Sell waar noch wolfel gwesst selli Zeit.
Dann iss er heemgezogge naach Deitschland, un hot Elisabeth gheiert, en Nochbersfraa in Kallstadt. Sie hot net fatt vun heem welle, awwer er hot gemisst. Weil er fattgange waar paar Yaahr eb sell, iss er kenn „Bavarian“ meh gwesst (die Pfalz hot zu Bavaria gheert zwischich 1816 un 1946) un hot kenn Recht meh ghatt fer bleiwe. Friedrich un Elisabeth Trump sinn in die USA gange — awwer ball iss er gschtarewe. Fer ihr Lewe mache, hot sie „E. Trump & Son“ gegrindt – sell iss, wie‘s aagfange hot mit em viele Geld, ass der Donald heit noch hot.
„Sell iss es Gebei“, sagt en Fraa un weist uff en glee Heisli. Datt henn die Voreldre vum Trump gwuhnt. Die Leit, ass heit drin wuhne, henn en Sign vannich es Haus ghenkt: „Gott sehnt alles, awwer mei Nochber sehnt noch meh!“ „In unser Schtettel gewwe mer acht uff enanner“, saagt sie, ass en Councillor iss in Kallschtadt un zamme schafft mit em Mayor. Iwwer Donald Trump schwetze gleicht sie awwer net.
Heit wuhne kenn Leit meh mit em Name Trump im Schtettel, awwer uff em Grabhof kammer der Name noch finne. Es gebt kenn Information — naryiets —, ass die Trump Familie vun Kallstadt gezogge iss naach America. Doch net yuscht selli Familie kummt vun Kallstadt, aa die Familie Heinz vun „Heinz Ketchup“ iss vun datt.
Wann die Leit in Kallstadt ihr Family Tree begucke, finne sie schnell aus, ass en latt vun ihne Freindschaft sinn zum Donald Trump. Awwer sie gleiche net, wie er schwetzt, un sie gleiche net, was er schwetzt. Alliebber in die Pfalz nennt Leit vun Kallstadt „Brulljesmacher“. In sell Watt schteckt vanne „Gebrill“, un es meent, ass die Leit vun Kallstadt gmeenerhand en wennich grooossmeilich sinn, besser sei welle ass die annere Leit drumrum – “Gebrillmacher” kennt mer saage. Die Leit vun Kallstadt gleiche der Name „Brulljesmacher“ net, sell iss ferschur. Un nau schwetzt der Doald Trump wie en „Kallstadter Brulljesmacher“. Nee, sell gleiche sie net in Kallstadt.
„Er macht aardlich viel Wind“, saagt die Schtorkiepern im Butcher Shop. Un en Fraa, ass reikummt in der Schtoor, saagt: „Nee, mer muss net schtolz sei uff der Trump. Er sett sich besser en wennich schemme!“. Yuscht een Kall im Schtor saagt, ass er schtolz iss uff der Trump. Er meent: „Mir henn aa Auswannerer in unser Familie ghatt. Die Leit vun Kallstadt sinn hattschaffiche Leit. Un sell iss, denk ich, der Donald Trump aa.”

Gfunne in en Zeiding in die Pfalz
un iwwergsetzt vun Hochdeutsch in die Mudderschprooch
beim Michael Werner, Publisher vun “Hiwwe wie Driwwe”

Deitsch Web TV: En Trump aus de Palz, en Seimaage – awwer kenn Party!

Donald Trump watt US President im Yenner 2017. Die meenschte Pennsylvanisch-Deitsche henn fer ihn gschtimmt.
Die meenschte Leit in Deitschland un aa in die Palz (Palatinate) hedde sell net geduh. Awwer so schafft Democracy, gell!
Der Grempaep vum Trump waar der Friedrich Drumpf, un er hot im glee Schtettel Kallstadt gewuhnt, eb er fattgezogge iss naach America.
En US Journalist hot sell Schtettel bsucht en Weil zerick un hot gschwetzt mit Freindschaft vum Donald Trump. Er waar eigelaade fer en Iems – es hot Seimaage un Wei gewwe. Der Journalist saagt ganz am End vum Video, ass die Leit vun Kallstadt ferschur en Party gewwwe, wann der Trump US President watt. Nee! Net waricklich. Un der Eegner vum Heisli, wu der Grempaep vum Donald Trump gewuhnt hot, hot yuscht geschter bekannt gemacht, ass er sell Gebei verkaafe will. Er will nix zu duh hawwe mit ebbes wie sell …

Deitsch Web TV: Gas Issues

Heit iss en Groosskind vum ‘me Paelzer Auswannerer, Friedrich Trumpf, gwaehlt warre zum neegschte US President.
Ich muss saage, ass ich waricklich net weess, was ich saage soll. Fer sell, un fer niemand baddere, schwetze mer vun ebbes schunscht. Sell iss verleicht es bescht Ding, ass mer duh kenne heit. Loss uns mol iwwer “Gas Issues” schwetze. Sell duht unser Freind un Co-Editor vun “Hiwwe wie Driwwe”, Doug Madenford, in sei nei Video …

Deitsche Web TV: “Baby Geh net Fatt Blues”

Chris LaRose vun Mount Etna (PA) waar in dem Yaahr der Schwetzer un Singer beim 11th German-Pennsylvanian Day in Hördt im alte Land.
Sei Program hot gheesse: “Pennsylvania Dutch Songs Never Sung”. Do iss eens vun sei Schticker: “Geh Net Fatt Blues”.

11th German-Pennsylvanian Day: Chris LaRose schpielt im alte Land

chris-larose-songs-never-sungDer 11. Deutsch-Pennsylvanische Tag nemmt Blatz am Sunndaag, October 16, 2016, in Hördt (Palatinate) im alte Land. Keynote Speaker – odder besser: “Singer” – iss in dem Yaahr Chris LaRose vun Kutzeschtettel. Er schpielt Lieder in Pennsylvaanisch-Deitsch. Der Versammling schtaert um 2 p.m.
Do kammer es Program sehne: Click!

Deitsch Web TV: Ebbes vun die Butscherei

En wennich ebbes vun die Butscherei Yaahre zerick verzehlt die Verna Dietrich vun Dietrich Meats in Krumsville, en glee Schtettel neegscht zu Kutztown (PA). In seller Schtor kennt dihr noch die deitsch Mudderschprooch yuuse fer Fleesch un Wascht kaafe. Sell iss ebbes Abbadiches, gell!

En nei pennsylvanisch-deitsch Archive im alte Land

Übergabe Deutsch-Pennsylvanisches Archiv (August 2016)

 

Es “Mennonite Research Center” (Mennonitisches Forschungszentrum) in Weierhof in die Pfalz hot sitter 2016 nei Archive, ass die Kultur un die Schprooch vun die Pennsylvanisch-Deitsche abweist zu alle Bsucher. Meh wie 1,200 Bicher, 100 CD’s un 120 Folders mit mehr wie 16,000 pennsylvanisch-deitsche Gschichte un Gedichte hot der Dr. Michael Werner (links uff em Pickter), Publisher vun “Hiwwe wie Driwwe”, vun sei Heemet zu sell neier Blatz gebrocht. Der Gary Waltner (in die Mitt) un die Astrid von Schlachta, Director vum Research Center sitter 2015, sinn froh fer sell Gschenk. Es “Mennonite Research Center”  iss en guud bekannter Blatz. Alle Yaahr kumme en latt Leit – abbadich Mennischte un Amish – aus Pennsylvaani, Ohio, Indiana, Illinois un annere Gegende ins alte Land fer sehne, wu die Voreldre gelebt henn, eb sie abgschtaert sinn ins neie Land. Awwer aa en latt Leit im alte Land henn en groosser Interest in die Gschicht vun die “Palatines”, ass naach America gezogge sinn. Nau gebt’s im Archive net yuscht Bicher iwwer die Gschicht vun die Mennischte un Amish, awwer aa iwwer alle Pennsylvanisch-Deitsche (aa Luddrische un Refemierte), ihr Schprooch un ihr Kulduur. Der Name vun die nei Collection iss “Deutsch-Pennsylvanisches Archiv”.