‘S Katz Deitsch Schtick: Parkland Highschool

Ganz schtill

Ganz schtill leischt du do, kannscht mich net heere.
Dei Aage sinn weit uff wie nie.
Gaeb’s yuscht en Weg, dei Ruh zu schteere,
Ich deet dich nemme ariyets hie.

Wie waar der Mariye so guud un schee,
Du waarscht deheem, bischt gange noht –
Un in die Schul. Un was ich seh
Iss nix wie Blut – un du bischt doot.

Do waar en Kall, do waar en Bix.
En Sack voll Bullets un schunscht nix.
Du hoscht gehockt am letze Blatz.
Der Schuss waar schnell – Dei Lewe katz.

Ganz schtill leischt du do, kannscht mich net heere.
Dei Aage sinn weit uff, mei Kind.
Waere mir schmaert, deet uns sell lehre
Es Lewe meh zu gleiche wie en Flint.

(In memoriam)

Advertisements

Deitsch Web TV: Peter Zacharias un sei Online Waddebuch

Peter Zacharias hot der “Award for Outstanding Pennsylvania German Activities” vun die “German-Pennsylvanian Association” grickt im Yaahr 2017, un nau iss er beim Patrick Donmoyer un schwetzt iwwer sei Project: en deitsch Online Waddebuch …

‘S Katz Deitsch Schtick:

Guder Daag Blog Leser! ‘S iss schpot Yenner … Hanning kummt. Dihr wisst, was sell meent: Grundsau Daag kummt gschwindt. Fer uns Deitsche iss Grundsau Daag wie en heilige Daag. Verschiddliche Grundsei kumme aus ihre Lecher un brophezeie iwwer es Wedder fer de naegschde sex Woche. Bleibt Winder lenger, odder kummt es Friehyaah frieh? Die Grundsau saagt uns. […]

über Grundsau Lodge Zeit! — Nau loss mich yuscht eppes saage!

Deitsch Web-TV: Die Amish Schprooch

Jeremiah Raber schwetzt English un Pennsylvanisch-DeitschUn er weist sei Youtube-Subscribers deel Wadde in die Mudderschprooch. Haricht sell mol ab.

Deitsch Web-TV: Easy Deitsch

Do iss en Lesson “Easy Deitsch” fer eich, ass die Luella Reed Sebo zammegrickt hot. En Gruuss zu dir datt driwwe im diefe Schnee! Im alde Land iss es Friehyaahr neegscht do. Deel Leit hoffe, der Winder kummt net zerick …

Deitsch Web-TV: Pennsylvania Dutch New Year’s Wish

Mir sinn froh, ass die Linda un der Mike Hertzog widder rumgezogge sinn darich die deitsche Gegende un der traditional pennsylvanisch-deitsch Neiyaahrswinsch gewwe henn. Sie duhne sell nau inschtatts vum Peter Fritsch (1945-2015), en guuder Freind, ass mer all verlore henn zwee Yaahr zerick. Der Mike un die Linda schpiele etliche Mol. Des do Video weist ab, wie sell geguckt un gelaut hot bei unser Freind Bill Meck (wu aa in 2017 en “Hanswascht” waar un aa in 2018 sei watt, gell!). Hallich Nei Yaahr zu alliebber im alte un im neie Land!

‘S katz deitsch Schtick: Disember

 

Disember

´S Yaahr iss alt. Sei Haar sinn dinn.
Guckt gaar nimmie gesund.
Weess, ass sei Daage rum ball sinn,
Kennt aa sei letschti Schtund.

En latt iss gschehne, deel aa net.
All sell ruht unnich Schnee.
Weiss iss die Welt – der Weg, wie’s sett.
Doch duhn Gedanke weh.

Noch waxt der Muhnd, noch watt er glee.
Nix bleibt. Un nix geht fatt.
´S iss alles waahr, was mer kann seh,
Un doch aa letz en latt.

Ball kummt der Belzenickel bei,
Deel Kinner waarde bang.
En Grischtbaam holt en Paep ball nei
Ins Haus. Die Zeit watt lang.

Waarscht aa en Kind. Denk mol zerick.
Du meindscht noch, wie sell fiehlt.
Heit glaabscht nimmie an der alt Nick,
Hoscht ihn schun oft geschpielt.

Ball schlagt em Yaahr sei letschti Schtund.
Noht iss es rum – wie’s sett.
Een Daag machscht aa mol zu dei Mund.
Doch wann sell iss, weescht net …

Michael Werner
(naach Erich Kästner)

Mer winsche alliebber im alte un im neie Land
en gsund un glicklich nei Yaahr 2018.

Deitsch Web-TV: Grischtdaag uff die Bauerei

Alle Yaahr im Disember gebt es “Pennsylvania German Cultural Heritage Center” en Eilaading zu alliebber fer nauskumme zu die Bauerei fer ausfinne, was die Pennsylvanisch-Deitsche an Grischtdaag geduh henn Yahre zerick. Seller Event heesst “Christmas on the Farm”. Der Doug Madenford, Co-Editor vun “Hiwwe wie Driwwe”, waar datt un hot en glee Video gemacht. Grooss Dank, Doug. En Gruuss aa zu die Lydia un der Mike Hertzog, zwee Musiganter, ass mer sehne kann im Video (sie schpiele Guitar un Bass). Sie waare in Deitschland im alte Land in Oktower 2017 fer der “12th German-Pennsylvanian Day”. Sell waar blessierlich. Un ya, der Terry Berger, iss aa druff. Terry, ich weess, mer henn im Tschulei des Yaahr beim Kutzeschtettel Folk Fescht yuscht katz neischtoppe kenne in dei Summerkich. Was du gekocht hoscht, hot abbadich guud geguckt un geroche – un’s neegscht mol nemme mer aa en wennich meh Zeit fer sell esse. Ich verschprech! En hallicher Grischtdaag zu eich all datt driwwe in K-Town.

Deitsch Web-TV: Pennsylvanisch-Deitsch Claess singt Grischtdaagslieder

Fred Fritch, eener vun mei favorite Facebook Buddies (wehich sei schmaerte Gedanke), iss en pennsylvanisch-deitscher Schulmeeschter in Longschwamp. Sei Claess kummt als noch zamme, denk ich, in Mertztown (PA). ‘S iss nimmie lang bis Grischtdaag, so will er mit sei Schtudente Grischtdaagslieder in die Mudderschprooch singe. Alsemol schafft sell ganz guud, alsemol misse sie noch en wennich die Wadde lanne. Ich hab sell Video gegliche! En hallicher Grischtdaag zu eich datt driwwe in Mertzeschtettel. Sehn eich ball mol widder …