Deitsch Web TV: Keith Brintzenhoff grickt en Award

Der Keith Brintzenhoff vun Kutzeschtettel (PA) grickt en “Award for Outstanding Pennsylvania German Activities”. Patrick Donomoyer, TV host un en Glied vum Board vun die German-Pennsylvanian Association, schwetzt mit em Keith iwwer sei Arewet un gebt ihm sei Award.

Advertisements

Deitsch Web TV: Johnny Cash in Pennsylvania Dutch

Mir wisse, ass en latt Leit der Johnny Cash (odder wie unser Freind, der John Schmid als saagt: der “Johann Geld”) un sei Music gleiche.
Im Oktower 2017 waare der Mike & die Linda Hertzog im alte Land fer die “Hiwwe wie Driwwe Palatinate Tour 2017”. Sie henn gschpielt in Ober-Olm, Oberalben, Bockenheim un beim 12. German-Pennsylvanian Day in Billigheim-Ingenheim. Un sie henn aa “Folsom Bressen Blues” un “Ring vun Feier” gschpielt un gsunge. Schticker, ass der Johnny Cash gschriwwe ghatt hot. Sell waar ferschur en latt Gschpass, un meh wie 500 Leit henn sell abgharicht. Der Drucker hot wennich rausgholfe un hot die Guitar gschpielt.

Mike un Linda Hertzog bsuche ‘s alte Land

Am Sunndaag, der fuffzeht Oktower 2017, nemmt der zwelft Deitsch-Pennsylvanisch Daag Blatz im Schtettel Billigheim-Ingenheim (Palatinate, Germany). Die Special Guests des Yaahr sinn der Mike un die Linda Hertzog vun Blandon (PA). Sie schpiele pennsylvanisch-deitsche Musick un deel Country Schticker – mit Banjo, Guitar un Bass Violine. Newich sell gebt’s zwee yunge Kalls, ass alleweil en Documentary am zammegricke sinn iwwer die pennsylvanisch-deitsch Schprooch un Kultur: der Christian Schega un der Benjamin Wagener. Un ya, es watt aa en latt gedanzt, weil der “12. German-Pennsylvanian Day” nemmt Blatz in die Heemet vun die “Trachtengruppe Billigheim”, un sell Drupp Leit iss die alde Daense noch am duh. Mer gucke vaschich zu sell. Die Versammling schtaert am zwee Uhr am Naachmiddag.

Do gebt’s wennich meh Information:
12. Deutsch-Pennsylvanischer Tag 2017 (Billigheim – Pfalz) – Programm

Deitsch Web-TV: Die September Deitsch Schtunn uff BCTV

Do iss en nei Program vun die “Deitsch Schtunn” uff BCTV Reading in Berks County. Der Host iss – wie immer – der Patrick Donmoyer, eener vun die Editors vun unser Zeiding “Hiwwe wie Driwwe”.

Deitsch Web-TV: Deitsche Scheierschtanne

Net yuscht “Hiwwe wie Driwwe” iss am schaffe uff en Documentary. Do iss noch en Trailer, un’s scheint, ass der ganz Film verzehlt ebbes iwwer die Gschicht un die Meening vun “Hex Signs” – “Hexezeeche”, ass mer besser “Scheierschtanne” heesst. Im Trailor verzehlt aa der Patrick Donmoyer, Editor vun “Hiwwe wie Driwwe”, ebbes …

Deitsch Web TV: “Hiwwe wie Driwwe” – En Documentary

“Hiwwe wie Driwwe” mol net ass en Zeiding, awwer ass en Documentary. Awwer die Editors vun “Hiwwe wie Driwwe” sinn debei. Der greescht Groosskopp im Film iss der Doug-Madenford (Co-Editor). Er macht sich uff die Rees vum neie Land ins alte Land fer ausfinne, wu sei Voreldre gewuhnt henn, un eb die Schprooch un die Kuldur datt es seem sinn wie in Pennsylvaani. Newich sell sinn in die Documentary aa der Patrick Donmoyer (Editor), der Dr. Michael Werner (Publisher) un en latt anneri Kalls un Weibsleit zu sehne. Die Documentary sett faddich sei im Friehyaahr 2018.

Deitsch Web TV: Ben Rader

Patrick Donmoyer, Editor vun “Hiwwe wie Driwwe” un “Host” vun es “Deitsch Schtunn”   Program uff BCTV, hot gschwetzt mit der Ben Rader vun Reeder (PA), wu der “Hiwwe wie Driwwe Featured Artist 2017” iss. Ya, un der “Dolpehocke Saenger Chor” singt …

Deitsch Web TV: Deitsch lanne mit em Keith Brintzenhoff

Erschte Wadde in Pennsylvanisch Deitsch. En Introduction vun unser Freind Keith Brintzenhoff in Kutzeschtettel, Pennsylvaani.

Deitsch Web TV: Hiwwe wie Driwwe Documentary 2018

Glaabt’s odder net, awwer “Hiwwe wie Driwwe” iss nimmie lang yuscht en Zeiding. “Hiwwe wie Driwwe” iss 2018 aa en “Documentary”. Zwee Kalls aus die Pfalz (Palatinate) im alte Land sinn alleweil hatt am schaffe fer sell Movie zamme gricke. Sie waare beim Kutzeschtettel Folk Fescht gwesst, un henn aa im alte Land hatt gschafft – immer zamme mit der Doug Madenford, Co-Editor vun Hiwwe wie Driwwe. Die “Documentary” weist alliebber sei Blaudereie im alte un im neie Land, un was er bei all sell lannt iwwer sei deitsch Schprooch un sei deitsch Kulduur. Heit kennt dihr schun mol en erschter gleener Trailer sehne …