Deitsch Riddle: Wer kennt seller Song?

Bu, loss dei Flint deheem

En yunger Bu, der Billy Joe, waar vun en Bauerei,
Er hot gegliche rumzuschpringe, mit anneri Buwe sei.
Hot anneri Gleeder aageduh, un Schtiffel noch dezu.
Sei Memm, die hot gegrische laut:

„Bu, loss dei Flint deheem.
Sie badde nix im Schtettel, Bill.
Loss doch dei Flint deheem.“

Er hot gelacht, sei Memm gebosst, un gsaat: „Ich bin en Mann.
Ich schiess so schnell un aa so guud, ass eenichebber kann.
Doch deet ich niemols schiesse ´s erscht. Die annere denke ´s seem.“
Sie hot gebrillt, wie er iss fatt:

„Bu, loss dei Flint deheem.
Sie badde nix im Schtettel, Bill.
Loss doch dei Flint deheem.“

Der Bill hot gsunge uff sei Weg. Sei Flint hot er debei.
Iss gange in die neegscht grooss Schtadt. Waar froh, mol fatt zu sei.
Am Greitzweg waar en Wattshaus, voll mit Leit, ass ich net bleem.
Doch denk ich an sei Memm graad nau:

„Bu, loss dei Flint deheem.
Sie badde nix im Schtettel, Bill.
Loss doch dei Flint deheem.“

Er hot gesoffe wie net gscheit, bis ruhig waar sei Hand.
Un hot sich gsaat ganz leis, ass er iss nau en Mann.
En wieschter Kall hot Schreit gesucht, wollt naus geh zu die Beem.
Der Bill hot gheert sei Mudder noch:

„Bu, loss dei Flint deheem.
Sie badde nix im Schtettel, Bill.
Loss doch die Flint deheem.“

Er waar verzannt. Der Billy Joe wollt nemme die alt Flint.
Der wiescht Kall hot en Kugel gschickt, ass glei der Billy findt.
Der iss noht gfalle, waar schier doot. En Yammer – wie ich meen.
Sei letschte Wadde waare noht:

„Bu, loss dei Flint deheem.
Sie badde nix im Schtettel, Bill.
Loss doch dei Flint deheem.“

Nau: Wie heesst der Song in englisch, un waer hot’s sell gsunge?