Richard Savidge vun Hegins (PA) hot der “Hiwwe wie Driwwe Award” 2011 grickt fer sei pennsylvanisch-deitsch Gedicht “S iss Winder im Daal”. Seller Award iss ans geh grickt warre bei die pennsylvanisch-deitsch Zeiding “Hiwwe wie Driwwe” un em “Paelzisch Mundartschreiwer Contest” im Schtettel Bockenheim im alte Land. En Jury vun 10 Leit hot die Gedichte un Gschichte gelese, ass beim Kutzeschtettel Folk Festival im Auguscht 2011 gelese sinn warre uff em Seminar Stage beim Dr. Bill Donner. Un sie henn gsaat, der Richard Savidge sett seller Award gricke fer’s Yaahr 2011. Mir saage “Congratulation” un sinn aarick froh, ass die Dale Schwoyer seller Award gewwe hot zum Bill in die “Pennsylvanisch-Deitsch Schtunn” TV Program uff Berks County Television (BCTV) am sext Yenner 2012. Dihr kennt es Interview un es Gedicht abwatche, wann dihr seller Link yuust: Klick datt!
(Noch eens: ‘S Program geht 60 Minudde. Es Interview mit em Richard Savidge schtaert in Minudd 27, un er lest sei Gedicht in Minudd 51. Mer muss net 60 Minudde bleiwe, wann dihr net wett. Geht graad zu Minudd 27, wann dihr kenn Zeit hennd. Awwer es Singes vum Dolpehocken Chor iss aa ganz guud. Viel Gschpass!)
The Pennsylvania German Newspaper 